Հյուսիսային Կորեան տեխնիկական հնարավորություններ ունի, որոնք թույլ են տալիս փոքրացնել միջուկային մարտալիցքը՝ այն տեղադրելու համար միջմայրցամաքային բալիստիկ հրթիռի վրա: TASS-ի հաղորդմամբ՝ այս մասին ուրբաթ օրը Պենտագոնում մամլո ասուլիսի ժամանակ հայտարարել է Կորեայի Հանրապետությունում ԱՄՆ զորքերի հրամանատար, գեներալ Քերթիս Սքափարոթին:
Նրանից հետաքրքրվել են՝ արդյոք Փխենյանը կարո՞ղ է արդեն այժմ ստեղծել միջուկային մարտագլխիկ ու միջոց՝ այն բալիստիկ հրթիռի տեսքի բերելու համար: «Նրանք պնդում են, որ արդեն արել են դա: Նրանք պնդում են, որ միջմայրցամաքային բալիստիկ հրթիռ ունեն (միջուկային մարտալիցքով)»,- ասել է Սքափարոթին:
«Նրանք այս փուլում, կարծում եմ, հնարավորություն ունեն փոքրացնել (միջուկային) սարքը, ունեն նաև տեխնոլոգիա, որը պոտենցիալ հնարավորություն է տալիս ստանալու այն, ինչ իրենց խոսքով՝ արդեն ստացել են»,- նշել է նա:
Նա նաև նշել է, որ այդպիսի զենքի փորձարկում Հյուսիսային Կորեան առայժմ չի անցկացրել: