Ֆրանսիայում քննարկվում է մուտքի վճար սահմանելու հարցը այն տաճարների համար, որոնք ֆրանսիացի և օտարերկրացի զբոսաշրջիկների շրջանում վայելում են մեծ ժողովրդականություն: Փարիզյան «Ֆիգարո» թերթի տեղեկությամբ՝ այդ հարցը բարձրացվել է երկրի մշակույթի և հաղորդակցության նախարարության ու Ազգային հուշարձանների կենտրոնի ներկայացուցիչների վերջին հավաքի ժամանակ:
«Ինչու մուտքը վճարովի չդարձնել՝ միաժամանակ երաշխավորելով, որ կրոնական ծեսերի անցկացումը կմնա անվճար»,- պարբերականը մեջբերում է հանդիպման մասնակիցներից մեկի խոսքը՝ չնշելով նրա անունը:
Այդ գաղափարի կողմնակիցների կարծիքով՝ այդ կերպ իշխանությունները կկարողանային ֆրանսիական բոլոր 77 խոշոր տաճարները պահելու համար անհրաժեշտ միջոցներ հավաքել և պահպանել դրանցում գտնվող արվեստի գործերը: «Ֆիգարո»-ն նշում է, որ կառավարությունը դեռ վերջնական որոշում չի կայացրել այդ հարցով:
Այնուամենայնիվ, ներկայում Ֆրանսիայում այն տաճարների մուտքը, որտեղ պահվում են սրբերի կամ կրոնական սրբավայրերի հետ կապված մասունքներ, վճարովի է՝ գանձվում է մոտ 4 եվրո: Ենթադրվում է 8.5 եվրո մուտքի վճար սահմանել ֆրանսիական բոլոր տաճարներում, իսկ եկեղեցիներին նաև թույլ տալ հատուկ վճարովի այցելություններ կազմակերպել զբոսաշրջիկների խմբերի համար: