Ղրիմ-Հայաստան թռիչքների հարցում Հայաստանի համաձայնությունը ոչ բարեկամական քայլ է Ուկրաինայի նկատմամբ և ռիսկային՝ Հայաստանի համար: «Առաջին լրատվական»-ի հետ զրույցում այս մասին ասաց ուկրաինական «Ռազումկովի կենտրոն»-ի Արտաքին հարաբերությունների և միջազգային անվտանգության ծրագրերի համաղեկավար, քաղաքական վերլուծաբան Օլեկսի Մելնիկը՝ անդրադառնալով «Սիմֆերոպոլ-Երևան» ավիահաղորդակցության բացմանը:
Նա նշեց, որ յուրաքանչյուր նմանատիպ քայլ Ուկրաինան դիտարկելու է որպես ոչ բարեկամական քայլ իր հանդեպ: Ուկրաինացի փորձագետը հիշեցրեց, որ Ղրիմը համարվում է Ռուսաստանի կողմից օկուպացված տարածք, Ղրիմի օկուպացիան չի ճանաչվում որևէ երկրի կողմից՝ բացի Ռուսաստանից, և նմանատիպ գործողությունները դիտարկվելու են որպես Ուկրաինայի ինքնիշխանության խախտում:
«Որևէ քայլի դիմելիս Հայաստանի ղեկավարները չպետք է մտածեն Ուկրաինային նեղացնելու մասին, այլ կան միջազգային իրավունքի նորմեր: ՀՀ ղեկավարները պետք է առաջնորդվեն երկրի ազգային շահերով, ոչ թե Ռուսաստանին կամ Ուկրաինային չնեղացնելու սկզբունքով: Առաջին հերթին իշխանությունը պետք է հետևի միջազգային իրավունքի նորմերին և երկրի ազգային շահերին: Որոշումները պետք է կայացվեն սրանից ելնելով»,- ասաց նա:
Վերջինս նշեց նաև, որ բացի քաղաքական հարթությունից՝ այստեղ կա նաև նեղ տնտեսական հարց. «Ցանկացած ընկերություն, որն իրականացնելու է այդ չվերթները դեպի օկուպացված տարածք, ցանկացած քաղաքացի, ցանկացած բիզնես՝ առանց Ուկրաինայի կենտրոնական ղեկավարության թույլտվության, պատժամիջոցների ներքո հայտնվելու ռիսկի է դիմում: Ապագայում այդ ընկերությունը կիրականացնի թռիչքներ միայն դեպի Ռուսաստան և Ղրիմ, եթե իրեն չեն հետաքրքրում միջազգային շուկաները»:
Հիշեցնենք, որ Ռուսական «Գրոզնի Ավիա» ընկերությունը նոյեմբերի 16-ից թռիչքներ կիրականացնի Սիմֆերոպոլ-Երևան-Սիմֆերոպոլ ուղղությամբ։ Այդ մասին «Ինտերֆաքս»-ին հայտնել էր Ղրիմի տրանսպորտի նախարար Անատոլի Ցուրկինը: Նրա խոսքով՝ դա կլինի «Սիմֆերոպոլ» օդանավակայանից երկրորդ միջազգային ավիաուղին, որը բացվել է Ռուսաստանին Ղրիմի միանալուց հետո: Ի տարբերություն Սիմֆերոպոլից Ստամբուլ չարտերային չվերթների, որոնք սկսվել են հուլիսից, Սիմֆերոպոլ-Երևան չվերթի տոմսերը հնարավոր կլինի գնել ամրագրման ցանկացած համակարգից: Ցուրկինի խոսքով՝ նոր ուղղությունով տոմսերի վաճառքը բացվել է հինգշաբթի օրը: Նա հայտնել է, որ ինքնաթիռները թռչելու են շաբաթը մեկ անգամ՝ կիրակի օրերին, Սիմֆերոպոլից մեկնումը նշանակված է տեղական ժամանակով ժամը 9:00-ին: Թռիչքի տևողությունը կլինի մոտ 1 ժամ 45 րոպե: ЯК 42Д ինքնաթիռները Սիմֆերոպոլից Երևան կթռչեն կիրակի, Երևանից Սիմֆերոպոլ՝ երկուշաբթի օրերին։ Ի դեպ, տեղեկություններ կան, որ չվերթի բացման նախաձեռնությունը Հայաստանի ղեկավարությանն է։
Նշենք նաև, որ «Ուկրաինական ավիաընկերությունները» դադարեցրել է Ղրիմ չվերթները այս տարվա մարտ ամսին թերակղզու՝ Ռուսաստանին միանալուց հետո: