Հայ-թուրքական հարաբերություններում գնդակը Թուրքիայի, իսկ հայ-ադրբեջանական հարաբերություններում Ադրբեջանի դաշտում է: Այսօր լրագրողների հետ հանդիպման ժամանակ ասաց ՀՀ ԱԳ նախարար Էդվարդ Նալբանդյանն՝ անդրադառնալով Թուրքիայի նախագահ Ռեջեփ Թայիփ Էրդողանի հայտարարությանը, թե թուրքական արծիվները փաստում են, որ ցեղասպանություն իրականացվել է թուրք ժողովրդի դեմ:
Նալբանդյանը նշեց, որ տարօրինակ է, որ այն նյութերը, որոնք պարունակվում են թուրքական արխիվներում, էականորեն իրենց բովանդակությամբ տարբերվում են այն նյութերից, որոնք առկա են աշխարհի արխիվներում և գրադարաններում: Ըստ նրա՝ այս պատճառով էլ Թուրքիայի իշխանությունների որդեգրած «զրո խնդիրներ հարևանների հետ» քաղաքականությունը զրո արդյունքի է հանգեցնում: «Մի քանի րոպե առաջ Գերմանիայի նախարարին փոխանցեցի մի ժողովածու՝ 240 փաստաթղթով, գերմանական արխիվներից, որոնք վկայում են Հայոց ցեղասպանության մասին»,- ասաց նախարարը:
Գերմանական լրատվամիջոցի հարցին, թե հնարավո՞ր է բեկում ակնկալել հայ-թուրքական, հայ-ադրբեջանական հարաբերություններում, ասաց, որ դեռ հինգ տարի առաջ ՀՀ նախագահի նախաձեռնությամբ լուրջ գործընթաց սկսվեց, որը հանգեցրեց Ցյուրիխի արձանագրությունների ստորագրմանը: Սակայն, նախարարի որակմամբ, Թուրքիան է, որ ուժ չգտավ իր մեջ վավերացնելու և իրականացնելու պայմանավորվածությունները: Նալբանդյանն ասաց, որ միջազգային հարաբերություններում պայմանավորվածությունները հարգելու սկզբունքն ամենակարևորն է, այնինչ այդ պայմանավորվածությունները Թուրքիան չկարողացավ հարգել և իրականացնել, այնպես որ՝ այդպիսի ժեստեր ՀՀ-ի կողմից արվել են, միջազգային հանրության կողմից նշվել է, որ գնդակը թուրքական դաշտում է: Ինչ վերաբերում է Ադրբեջանին, ապա ՀՀ-ն, նախարարի խոսքով, պատրաստ է գնալ խնդրի կարգավորմանն այն առաջարկների հիման վրա, որոնք արվում են եռանախագահող երկրների կողմից: Նախարարը մասնավորապես ընդգծեց վերջին հինգ հայտարարությունների մասին՝ ընդգծելով, որ գնդակը ադրբեջանական դաշտում է: