«Առաջին լրատվական»-ին հասած տեղեկություններով՝ արդարադատության նախարարության դատական ակտերի հարկադիր կատարման ծառայության ղեկավար, արդարադատության գեներալ-մայոր 38-ամյա Միհրան Պողոսյանը շուրջ մեկ տարի է՝ Ծաղկաձորի Կեչառիս հյուրանոցային համալիրի նոր սեփականատերն է: Նախկին սեփականատերերից գնելուց հետո նա վերանորոգել է հյուրանոցը:
ԴԱՀԿ ծառայություն գրավոր հարցեր ուղարկեցինք՝ հարցնելով, թե ինչպե՞ս են մեկնաբանում այս տեղեկությունը և որքա՞ն գումարով ու ի՞նչ միջոցներով է գնել Միհրան Պողոսյանն այդ հյուրանոցը: ԴԱՀԿ մամուլի խոսնակ Ռիմա Եգանյանը բանավոր հայտարարեց, որ «դա իրականության հետ կապ չունի», իսկ երբ խնդրեցինք գրավոր պատասխանել մեր հարցերին, դադարեց պատասխանել հեռախոսազանգերին:
Ուշագրավն այն է, որ ԴԱՀԿ պետի հայտարարագիրը չկա պետական պաշտոնյաների էթիկայի հանձնաժողովի կայքում: Հայտնի է, որ Միհրան Պողոսյանը Սերժ Սարգսյանի սանիկն է: Նրա կենսագրականից հայտնի է դառնում, որ նա 2006 թվականից պետական պաշտոններ է զբաղեցնում և 97-ին հիմնադրել է մեկ ընկերություն՝ «Քեթրին» անվամբ: Ստացվում է՝ այդ մեկ ընկերությունը կարող է տասնյակ միլիոնավոր դոլարների եկամուտներ ապահովել՝ այն էլ Հայաստանում:
Վերջերս Երևանի Կոմիտասի պողոտայում վերաբացվել է «Ֆրեշ» սուպերմարկետը: Մի քանի տարի առաջ «Սթար» խանութների ցանցը գնեց «Ֆրեշ 4» խանութների և «Քեթրին 3» խանութների ցանցը: Այս ցանցը պատկանում է «Քեթրին գրուպին», որի հիմնադիրը Միհրան Պողոսյանն է: Սթարի սնանկացումից հետո կրկին վերաբացվել է «Ֆրեշ» սուպերմարկետը: ԴԱՀԿ-ին ուղղված «Առաջին լրատվական»-ի հարցը, թե սա նշանակո՞ւմ է, որ Միհրան Պողոսյանի բիզնեսն ընդլայնվում է, առկախ մնաց:
Ինչպես հայտնի է՝ ԴԱՀԿ պետ Միհրան Պողոսյանը դատի է տվել «Սթար» սուպերմարկետների սնանկացած ցանցի սեփականատեր, «Արզնի» հանքային ջրերի գործարանների նախագահ Գևորգ Աֆանդյանին՝ պահանջելով հօգուտ իրեն բռնագանձել իր կողմից Աֆանդյանին փոխառությամբ տրված 5 մլն 146 հազար 842 ԱՄՆ դոլարը և տուգանային տոկոսները։