Եթե Ռուսաստանը շարունակի ամրապնդել ռազմական ներկայությունը տարածաշրջանում. Ադրբեջանն ու Ռուսաստանը կբախվեն: «Առաջին լրատվական»-ի հետ զրույցում ասաց Բաքվի Քաղաքական ինովացիաների և տեխնոլոգիաների կենտրոնի տնօրեն, ադրբեջանցի քաղաքական վերլուծաբան Մուբարիզ Ահմեդօղլուն:
Նա նշեց, որ Ադրբեջանում շատերը ոչ միայն մտավախություններ ունեն կապված Ռուսաստանի քաղաքականության հետ, այլև ռուսատյաց են: Ըստ նրա՝ շատերին է անհանգստացնում Ռուսաստանի ռազմական ներկայության ընդլայնումը Հարավային Կովկասում և Հայաստանում:
«Դա վտանգում է Ադրբեջանի ազգային շահերը ևս: Այն, ինչ Ռուսաստանն իրականացնում է Կովկասում` ի վերջո Ադրբեջանին հրահրում է լարվածության, քանի որ Ադրբեջանի և Ռուսաստանի շահերը բախվելու են: Ադրբեջանը իրեն համարում է տարածաշրջանի լիդեր երկրներից մեկը, ձգտում է տարածաշրջանում համագործակցության և ազդեցության ընդլայնման, ինչը նաև Ռուսաստանի նպատակն է, իսկ դա, ի վերջո, խոչընդոտում է նաև Ադրբեջանի զարգացմանը: Ադրբեջանին անհանգստացնում է նաև, որ Ռուսաստանը զենք է վաճառում և Ադրբեջանին, և Հայաստանին»,- մեկնաբանեց Մուբարիզ Ահմեդօղլուն:
Հիշեցնենք, որ The Guardian-ի հոդվածում ասվում է, որ Մոսկվան պատրաստվում է ընդլայնել իր ռազմաօդային բազաները Հայաստանում և Ղրղըզստանում, ինչպես նաև ծրագրում է կործանիչների համար Արևելյան Բելառուսում 2016թ. ավիաբազաներ կառուցել: Այս մասին ասել է Ռուսաստանի ռազմաօդային ուժերի գլխավոր հրամանատար Վիկտոր Բոնդարյովը:
Հայաստանը, Ղրղըզստանը և Բելառուսն անվտանգության ազատ դաշինքի անդամներ են, որը գլխավորում է Ռուսաստանը, և հայտնի է որպես Հավաքական անվտանգության մասին պայմանագրի կազմակերպություն: Այն արագացրեց ՀՕՊ միասնական համակարգի ստեղծման տեմպերը, քանի որ ուկրաինական ճգնաժամը նոր խթան է տվել Արևմուտքի ուժային բլոկի՝ ՆԱՏՕ-ի զարգացման համար՝ ասվում է հոդվածում:
Դեռ մինչ Ուկրաինայում հակամարտությունը՝ Ռուսաստանը, նախագահ Վլադիմիր Պուտինի ղեկավարությամբ, զգալի ջանքեր է գործադրել, որպեսզի վերականգնի իր պատմական ռազմական ներկայությունն Արևելյան Եվրոպայում, Կենտրոնական Ասիայում, Արկտիկայում և այլ երկրներում: Այժմ բանակցություններ են տարվում Վիետնամի, Կուբայի, Վենեսուելայի և Նիկարագուայի հետ ռուսական ռազմավարական ռմբակոծիչների համար բազաների կառուցման վերաբերյալ՝ գրում է թերթը:
