Առաջիկա երկու ամիսների ընթացքում Ազգային ժողովը պետք է հասցնի մի քանի տասնյակ օրինագծեր ընդունել, որոնք կապված են Հայաստանի՝ Եվրասիական տնտեսական միությանն անդամակցելու հետ: Եվ մինչև տարեվերջ ՀՀ օրենսդրությունը պետք է համապատասխանեցվի ԵՏՄ-ին, քանի որ 2015 թ. հունվարից Հայաստանը պետք է անդամակցի այդ կառույցին:
ԱԺ Հանրապետական խմբակցության ղեկավար Վահրամ Բաղդասարյանի խոսքերով՝ մինչև տարեվերջ խորհրդարանի աշխատանքը թեժ է լինելու, քանի որ արդեն սկսվելու են նաև 2015 թ. բյուջեի և բյուջեի հետ կապված նախագծերի քննարկումները: Եվ նրա խոսքերով՝ հենց այդ խնդիրների պատճառով էլ վարչապետ Հովիկ Աբրահամյանն այսօր եկել էր խորհրդարան և ԱԺ նախագահ Գալուստ Սահակյանի մոտ հանդիպել մշտական հանձնաժողովների ղեկավարների հետ:
Իսկ Հայաստանի՝ ԵՏՄ-ին միանալու պայմանագիրը նախ պետք է քննարկվի Սահմանադրական դատարանում, հետո վավերացվի Ազգային ժողովում: Այդ ընթացքում Հայաստանի պայմանագիրը պետք է վավերացվի նաև ԵՏՄ հիմնադիր անդամներ Ռուսաստանի, Բելառուսի և Ղազախստանի խորհրդարաններում: Իսկ հնարավո՞ր է, որ այդ երկրներից հատկապես վերջին երկուսի խորհրդարանները չվավերացնեն Հայաստանի պայմանագիրը: Չէ՞ որ նրանց նախագահներ Ալեքսանդր Լուկաշենկոն և Նուրսուլթան Նազարբաևը որոշակի դժգոհություններ ունեն մեր անդամակցության հետ կապված: Այդ երկու նախագահները կարող են իրենց խորհրդարանների միջոցով կասեցնել կամ ձգձգել Հայաստանի անդամակցումը: «Չեմ կարծում, հակառակ դեպքում ի՞նչ է նշանակում, իրենց ոչ հարգալից վերաբերմո՞ւնքն իրենց նախագահների նկատմամբ: Իրենց նախագահները ողջունել են, շնորհավորել են մեր նախագահին առանց որևէ առարկության»,- մեր հարցին պատասխանեց Վ. Բաղդասարյանը:
