Ջոհար Ցարնաևի քրոջը՝ Ալինա Ցարնաևային, ձեռնաշղթաներով դուրս են տարել նյույորքյան դատարանի դահլիճից, որտեղ երեքշաբթի օրը եղել են նրա գործով լսումները: Ջոհար Ցարնաևին ամերիկյան իշխանությունները կասկածում են 2013թ. Բոստոնի մարաթոնի ժամանակ պայթյունների կազմակերպման համար: ITAR-ТАSS-ի հաղորդմամբ՝ այս մասին հայտնել է Ցարնաևայի փաստաբանը՝ Սյուզան Մարկուսը, որի խոսքով՝ իր պաշտպանյալը ոչ մի վտանգ չի ներկայացնում և արժանի չէ բանտարկված մնալու:
Նյու Ջերսի նահանգում ապրող 24-ամյա Ցարնաևան ձերբակալվել է օգոստոսի 27-ին: Ձերբակալության պատճառը մի կնոջ հասցեին հնչեցված ապառնալիքներն են, որը Ցարնաևայի ամուսնուց երեխա է լույս աշխարհ բերել: «Ես ճանաչում եմ մարդկանց, ովքեր կգան քեզ մոտ և ռումբ կդնեն»,- ասել է Ցարնաևան:
Ցարնաևային դատարանի դահլիճից դուրս են տարել ձեռնաշղթաներով, բայց դեռ պարզ չէ՝ նա կմնա՞ բանտում, թե՞ ոչ, քանի որ դատավորը նրա համար ազատվելու դիմաց գրավ է նշանակել՝ 5 000 դոլար:
Ցարնաևան նաև կասկածվում է Մասաչուսեթսում թղթադրամներ կեղծելու համար: Նա հրաժարվել է համագործակցել հետաքննության հետ և հիմա պարտավոր է պարբերաբար ներկայանալ ոստիկանության բաժին:
