Ավելի վաղ անդրադարձել էինք Ֆրանսիայի Նիս քաղաքի հայկական համայնքում անառողջ մթնոլորտին, համայնքի՝ մի քանի մասերի բաժանված լինելուն: Նիսի նախկին կրոնական ընկերակցությունը, որ Հայ առաքելական եկեղեցու գերագույն հոգևոր խորհրդի 2012թ. հունվարի 26-ի որոշմամբ զրկվել է «Հայ Առաքելական եկեղեցի» տիտղոսից, դատական հայց է ներկայացրել 2010թ. սեպտեմբերի 19-ին Նիսի ծխի հովիվ նշանակված Հ. Գրիգոր աբեղա Խաչատրյանի դեմ: Նախկին կրոնական ընկերակցությունը, հայր Գրիգորի խոսքով, իրեն ուզում է հովվատնից հանել:
«Դեռ մեկ տարի առաջ, երբ Սուրբ ծննդյան պատարագը կաթոլիկ եկեղեցում արեցի, որպեսզի առճակատումից խուսափեմ (իրենք շատ անգամ գալիս էին եկեղեցի սադրանքներ անելու, որ կռիվ հրահրեն), պատարագ արեցի ուրիշ տեղ: Մեկ-երկու շաբաթ անց եկեղեցու փականը փոխեցին, և այլևս չկարողացա մտնել եկեղեցի, և իրենք իրենց կողմից հրավիրեցին կարգալույծ եկեղեցականի, որը ոչ մի եկեղեցական կարգուկանոն չի հարգում, եթե հարգի եկեղեցու կարգուկանոնը, Մոսկվայից չէր գա Ֆրանսիա»,- ասել էր հայր Գրիգորը:
Նիսի ծխի Հայ եկեղեցու հովիվ նշանակված Հ. Գրիգոր աբեղա Խաչատրյանն «Առաջին լրատվական»-ի հետ զրույցում նշեց, որ դատն ավարտվել է հօգուտ Հայ առաքելական եկեղեցու:
«Դատական գործընթաց կոչվածը ինքնին ինձ համար խորթ է, և մեծապես ցավում եմ, որ Նիսի համայնքից ներս տիրող ճգնաժամը հաղթահարելու համար միայն այս միջոցն էր մնացել: Այդուհանդերձ հուսով եմ, որ մարդիկ խելամիտ կգտնվեն և գոնե այս հանգրվանին կդադարեցնեն իրենց պառակտիչ և ավերիչ գործընթացը: Դատարանը որոշել է, որ Նիսի նախկին կրոնական ընկերակցությունը իրավունք չունի կոչվելու «Հայ Առաքելական եկեղեցի», և վերոնշյալ կարծեցյալ կրոնական ընկերակցությունը Հայ Առաքելական եկեղեցին ներկայացնելու իրավունք չունի: Այդ թվում՝ այդ ընկերակցությանը արգելվում է որևէ ծիսակարգ կատարել: Այսինքն՝ դատարանը ամբողջությամբ հաստատել է Հայ Առաքելական եկեղեցու Գերագույն հոգևոր խորհրդի 26 հունվար 2012-ի ընդունած որոշումը»,- նշեց հայր Գրիգորը:
Նրա խոսքով՝ անակնկալ չէր որոշումը, սպասված էր, մանավանդ նկատի ունենալով պահանջների արդարացիությանը: Սա, նրա խոսքով, արդեն երկրորդ դատն է, որ կորցնում են:
