«Առաջին լրատվական»-ի զրուցակիցն է Քաղաքական և միջազգային հետազոտությունների հայկական կենտրոնի տնօրեն, քաղաքագետ Աղասի Ենոքյանը:
-Պարոն Ենոքյան, ՀՅԴ քայլը՝ չմասնակցել մարզային հանդիպումներին և այսպես կոչված՝ համապետական հանրահավաքին, նոր իրողությո՞ւն է, քառյակը տրոհվո՞ւմ է: Թե՛ ՀՅԴ-ն, թե՛ քառյակի կուսակցությունները շարունակում են պնդել, որ քառյակում պառակտում չկա:
-Մենք ունենք հին իրողության նոր արտահայտում: Ինչի՞ համար էր այդ քառյակը, փաստորեն խորհրդարանում այն բոլոր ուժերը, որոնք չէին մտել իշխանություն, նրանք միավորվեցին ոչ իշխանական քառյակում: Այս քառյակի առաջ խնդիր չի դրվել լինել ընդդիմություն, այս քառյակը քաղաքական հարցեր երբեք չի բարձրացրել, քաղաքական պահանջներ չի դրել: Այսինքն՝ սա մի արհեստական կոնգլոմերատ էր և այնպես չէր, որ այստեղ մտած բոլոր ուժերը պարտավոր էին մնալ սկզբնական պայմանավորվածությունների շրջանակներում, մանավանդ որ եթե ուշադիր նայենք, Դաշնակցությունը դրա մեջ մնալուց որևէ շահ չուներ:
–Այսինքն՝ ՀՅԴ-ն տեսավ, որ շահ չունի, դրա համար հրաժարվե՞ց:
-Ի սկզբանե պարզ էր, որ նա շահ չունի: Հիմա միգուցե նա գտել է իր շահը իշխանությանն ավելի մոտ լինելու մեջ, միգուցե նրա շահն է ցույց տալ, թե որքան բոբիկ է այսօր ԲՀԿ-ի և ՀԱԿ կուսակցության միավորումը: Տարբեր խնդիրներ են, ամեն մի կուսակցություն իր համար իր խնդիրն է լուծում, կրկնեմ, եթե իրենց առաջ չկա դրված միասնական մեծ համապետական, համաժողովրդական խնդիրներ, իսկ այսպիսի խնդիրներ այս ուժերն իրենց վրա չէին ուզում վերցնել: Տեսեք, այս ընթացքում ինչքան կարևորագույն հարցեր են եղել կանգնած Հայաստանի առաջ՝ սկսած սեպտեմբերի 3-ից, մինչ այդ ԵՄ-ի հետ կապված գործընթացից սկսած, օգոստոսին հայ-ադրբեջանական ռազմաճակատում սրացումներում, որևէ հարցում այս քառյակը որևէ խնդիր չբարձրացրեց: Ի՞նչն էր իրենց խնդիրը… կարմիր գծեր, կարմիր գծերի համա՞ր են միտինգ անելու: Եվ այս ընթացքում իսկապե՞ս էլ խնդիր չի եղել Հայաստանի առաջ, պարզապես զարմանալի է: Այնպես որ, այս քառյակը տրոհելը չափազանց հեշտ էր: Ի վերջո, քառյակ լինելու իմաստն այն էր, որ չերևար, որ այստեղ ՀԱԿ-ն իր վաղեմի ախոյանի՝ ԲՀԿ-ի հետ մտել է ալյանսի մեջ: Իսկ հիմա դա ավելի պարզ է դառնում, որ կողքի անտուրաժը վերանում է, ավելի պարզ է դառնում, որ ՀԱԿ-ը խնդիր ունի գոյատևելու, իսկ ԲՀԿ-ն խնդիր ունի իր դեմքը մաքրելու և այդ պատճառով է այս կուսակցությանը վերցրել որպես իրեն դաշնակից:
-Մենք այսօր ունենք տրոհվա՞ծ քառյակ:
-Քառյակ երբեք չի էլ եղել, պարզապես այս ուժերը, հախուռն տեսնելով իշխանություն և ոչ իշխանություն բաժանարար գծերը, կանգնել էին մյուս կողմում:
Ավելին՝ տեսանյութում: