«Առաջին լրատվական»-ը զրուցել է ԱՄՆ ARPA ինստիտուտի տնօրեն Հակոբ Փանոսյանի հետ:
-Պարոն Փանոսյան, ըստ Ձեզ՝ ի՞նչ է Հայաստանը Սփյուռքի համար: Արդյո՞ք Սփյուռքը պատասխանատվություն կրում է Հայաստանի համար: Կարծիք կա, որ Սփյուռքը հայրենիք դիտարկում է Արևմտյան Հայաստանը, դրա համար այստեղի խնդիրները չի դիտարկում որպես իր խնդիրներ: Համամի՞տ եք:
–Սփյուռքը Հայաստանի ներկայիս կյանքում շատ մեծ դեր չունի, բայց պետք է շատ դեր ունենա: Պասիվության շատ պատճառներ կան, դրանցից մեկը իրար հասկանալու ունակությունն է: Լավ չենք հասկանում իրար, լավ չենք կարողանում ըմբռնել իրար սովորությունները, թուլությունները, ուժեղ կողմերը: Իրար հետ շփումը պետք է շատանա, որ իրար ավելի լավ հասկանանք և այդ ժամանակ վստահություն ունենանք ու կարողանանք իրար հետ աշխատել:
-Գուցե դա նրանից է, որ սփյուռքը Հայաստանը դիտարկում է որպես ոչ իր հայրենիք, ավելի շատ Արևմտյան Հայաստանն է հայրենիք դիտարկում:
–Չեմ կարծում, որ որևէ սփյուռքահայ այդ մտածելակերպն ունի: Ես կարծում եմ՝ հայրենիքը հայրենիք է մեզ համար: Արևմտյան Հայաստան թե Արևելյան Հայաստան՝ միևնույն է, Հայաստան է: Եթե այդպես արտահայտվողներ կան, ուրեմն դրանք պատրվակներ են: Ես որևէ տարբերություն չեմ տեսնում:
–Հայաստանի կյանքում Սփյուռքը արդյոք որևէ դերակատարություն ունի՞: Ինչու եմ հարցնում. բացի ամենամյա մարաթոներին գումար հատկացնելուց, սփյուռքը արդյոք պատասխանատվություն կրո՞ւմ է հայրենիքիհամար:
–Շատ մեծ պատասպանատվություն պետք է կրի, բայց ներկայումս՝ ոչ մի պատասխանատվություն: Միայն նյութական նվերներ կամ գործունեություն: Մեր կազմակերպությունը տարբեր է, մենք մասնագիտական օգնություն ենք տրամադրում՝ Հայաստանի համալսարանների, ակադեմիայի, նախարարությունների հետ ենք աշխատում:
Մեր կազմակերպությունը կազմված է տարբեր բնագավառների մասնագետներից, և հավատում ենք, որ Հայաստանի համար ամենակարևորը մասնագիտությունն է: Ամենակարևոր նախաձեռնություններից մեկը, օրինակ, նորարարության մրցույթն է համալսարանական ուսանողների համար: Ահավասիկ, արդեն յոթերորդ տարին է, որ անում ենք: Նպատակն այն է, որ Հայաստանում երիտասարդ տարրը մտածի ավելի նոր արտադրանքներ ստեղծելու մասին, որպեսզի Հայաստանը տնտեսապես ավելի մրցունակ երկիր դառնա, զարգանա և նմանօրինակ այլ բաներ: Մեր նպատակն է այստեղ զարգացնել տեխնոլոգիաները, թե՛ նորարարություններին ավելի մեծ ուշադրություն դարձնել և թե՛ Հայաստանի համար ավելի հարմար տնտեսության վրա աշխատել:
–Հովիկ Աբրահամյանը երբ վարչապետ դարձավ, ասաց, որ Հայաստանը սփյուռքի, սփյուռքահայ գործարարների համար պետք է ավելի հետաքրքիր դարձնել: Հետաքրքրվա՞ծ է այս ամիսների ընթացքում սփյուռքը:
–Բավարար չէ, և պատճառը իրար նկատմամբ վստահության հարցն է, իրար հասկանալն է: Պետք է ավելի հետաքրքրվի սփյուռքը, այլապես մենք եղած Հայաստանն էլ կկորցնենք:
Ամբողջությամբ՝ տեսանյութում