Իր մասնակցությունը «Իսլամական պետության» դեմ պայքարում Ֆրանսիան կսահմանափակի ավիահարվածներով։
Ֆրանսիան մտադիր չէ ցամաքային զորքեր ուղարկել Իրաք «Իսլամական պետություն» խմբավորման դեմ պայքարի համար, սակայն պատրաստ է օդային աջակցություն ցույց տալ ռազմական գործողություններին։ Այդ մասին հայտարարել է Ֆրանսիայի նախագահ Ֆրանսու Օլանդը հինգշաբթի Ելիսեյան պալատում տեղի ունեցած մամլո ասուլիսում, հաղորդում է RIA Novosti-ն։
«Ես որոշեցի պատասխանել Իրաքի իշխանությունների խնդրանքին՝ նրանց օգնություն առաջարկելով օդից։ Մենք ավելի առաջ չենք շարժվելու։ Մենք դուրս չենք գալու շրջանակներից, այնտեղ չեն լինի ցամաքային զորքեր և ինտերվենցիա, Իրաքից բացի, չի լինի»,- նշել է Օլանդը։
Հաղորդվում է, որ ֆրանսիական ավիացիան շաբաթվա սկզբից վերահսկում է Իրաքի օդային տարածքը։
Ավելի վաղ ԱՄՆ նախագահ Բարաք Օբաման հայտարարել էր երկրի ռազմական համակազմի՝ Իրաքում ցամաքային գործողությանը չմասնակցելու մասին։
