Երեկ՝ օգոստոսի 27-ին, Ուկրաինայում հայերի միությունը Ուկրաինայի Կարմիր խաչի աշխատակիցներին է հանձնել ավելի քան 90 տոննա մարդասիրական օգնություն Դոնեցկի ու Լուգանսկի մարզերի կարիքավոր ընտանիքներին:
Մարդասիրական բեռը պարունակում է սննդամթերք, առաջին անհրաժեշտության իրեր և այլն, հայտնում է ուկրաինական AnalitikaUA.net կայքը՝ հղում անելով կազմակերպության հաղորդագրությանը, համաձայն որի՝ Ուկրաինայի հայերի միությունն ու Կարմիր խաչը համագործակցում են մարդասիրական օգնության ցուցաբերմանը վերաբերող հարցերում:
Ուկրաինայի առաջին ալիքը հայտնել է, որ մարդասիրական բեռը ուղարկվել է Խարկովից:
Ըստ ՈՒՆԻԱՆ գործակալության՝ 20 տոննա բեռը հավաքել է Կիևի հայկական համայնքը, որը տեղափոխման ու տեղաբաշխման օգնության խնդրանքով դիմել է Ուկրաինայի ՆԳՆ-ին:
Ուկրաինայի ներքին գործերի նախարարի խորհրդական Անտոն Գերաշչենկոն ու ՆԳՆ ղեկավարի արտաքին կապերի ու եվրաինտեգրման հարցով տեղակալ Տիգրան Ավագյանը հանդիպել են լրագրողների հետ և հայ համայնքի ներկայացուցիչների հետ ներկայացրել մարդասիրական օգնությունը:
Սյուժեն՝ Ուկրաինայի Առաջին ալիքի: