Չորեքշաբթի օրը Վաշինգտոնի կենտրոնում հանրահավաք է տեղի ունեցել ռասայական խտրականության և ոստիկանության աշխատակիցների կամայականությունների դեմ, հայտնում է ITAR-TASS-ը:
Ակցիան կազմակերպվել է ի նշան ԱՄՆ Միսսուրի նահանգի Ֆերգյուսոն քաղաքում իրադարձությունների դեմ բողոքի, որտեղ ոստիկանը սպանել էր 18-ամյա սևամորթ Մայքլ Բրաունին:
Ցույցը, որին մասնակցել են Վաշինգտոնի տասնյակ բնակիչներ, անցկացվել է ԱՄՆ արդարադատության նախարարության գլխավոր մուտքի մոտ՝ Սպիտակ տնից ոչ հեռու: Ցուցարարաների թվում եղել են ոչ միայն աֆրոամերիկացիներ, այլև խառնամուսնություններից ծնված մարդիկ: Նրանք ձեռքում պահել են «Ձեռքերը վե՛ր: Չկարակե՛լ», «Սգում ենք Բրաունի մահը», «Արդարադատություն սպանված դեռահասի համար», «Մենք արդարություն ենք ուզում», «Վերջ տվեք խտրականությանը» գրություններով պաստառներ:
Ամերիկյան «Ոչ վախին» հասարակական շարժման առաջնորդ Մարշա Քոլմանը հանրահավաքի մասնակիցներին դիմել է կոչով՝ աջակցել «աֆրոամերիկացիների նկատմամբ անօրինականությանը վերջ տալու» մասին ամերիկյան իշխանություններին ուղղած իրենց պահանջին:
Քոլմանը կարդացել է խնդրագիրը, որը ստորագրել են հարյուրավոր ամերիկացիներ՝ Մայքլ Բրաունի սպանությունը մանրամասնորեն հետաքննելու, տղայի վրա կրակած ոստիկանին օրենքի ամբողջ խստությամբ պատժելու, օրինապահ մարմիններին բանակային սարքավորումներով զինելուն վերջ տալու պահանջով:
Ակցիան խաղաղ բնույթ է կրել և ավարտվել առանց որևէ պատահարի:
