Արարատի մարզի Այգեստան համայնքը 2000-ից ավելի բնակիչ ունի: Հիմնականում մշակում են դեղձ և խաղող: Գյուղացիները «Առաջին լրատվականի» հետ զրույցում նշեցին, որ եթե եղանակային տհաճ անակնկալներ, ջրի հետ կապված խնդիրներ չլինեն, կարող են հողագործության շնորհիվ գոնե նորմալ ապրել: Համայնքում հիմնական խնդիրը կապված է ոռոգման ջրի հետ. ամեն օր չեն տալիս, բացի այդ՝ լինելու դեպքում էլ համայնքում 100 հող միանգամից ջրում են, մնացածներին հերթը կարող է չհասնել: Գյուղատնտես Արթուր Մարտիրոսյանն իր հողատարծքում հիմնականում խաղող ունի։ Մեզ հետ զրույցում նա ասաց, որ միայն 4 մարգ խաղողի մշակման, ջրի և դեղերի գումարը կազմում է 150-200 հազար դրամ, իսկ ընդհանուր առմամբ՝ 250 հազ. դրամ, լավ վաճառելու դեպքում ընդհանուր գումարը կազմում է շուրջ 400 հազար դրամ, որից հանվում է շուկա տանելու, ամսական վարկի գումարը, և մնացածը միայն՝ գյուղացուն, որով և պետք է ընտանիքը պահի:
«Առաջին լրատվականի» հետ զրույցում համայնքի ղեկավարի տեղակալ Խաչիկ Աբգարյանը նկատեց, որ եթե գյուղում ակտիվորեն հողագործությամբ զբաղվեն, ջրի խնդիր չլինի, մթերումները կկազմակերպվեն: Նա նկատեց, որ այս տարի վաղահաս դեղձի մթերման հետ կապված լուրջ խնդիրներ են եղել, բայց լուծվել են: Նաև ասաց, որ սպասում են խաղողի մթերմանը:
Ըստ նրա՝ գյուղացու հիմնական խնդիրներից է նաև վարկը։ «Բոլորը ունեն։ Ես չունեի՝ հիմա ես էլ ունեմ՝ 400 հազար դրամ»,- ասաց նա՝ հավելելով, որ գյուղացու համար վարկերը պետք է լինեն ցածր տոկոսդրույքով:
Առավել մանրամասն՝ տեսանյութում։
