ՀՀ կրթության և գիտության նախարար Արմեն Աշոտյանն այսօր հանրապետության ավագ դպրոցների մանկավարժների օգոստոսյան խորհրդակցությունից հետո պատասխանել է բացառապես կրթության ոլորտին վերաբերող հարցերին:
Այնուամենայնիվ, Աշոտյան քաղաքական գործչի ձայնը լսելի կլինի նոր քաղաքական տարում. «Այսօր ինձ համար շատ ավելի կարևոր է ուսումնական տարվա հետ կապված ցանկացած խնդիր, քան քաղաքական հայտարարությունները: Թույլ տվեք այսօր և գոնե մինչև սեպտեմբերի 1-ը ներառյալ աշխատեմ բացառապես որպես կրթության նախարար»,- ասաց նախարարը՝ հավելելով, որ քաղաքական հայտարարություններն իրենց երկար սպասել չեն տա, պարզապես այս պահին չի լսել որևէ այլ բան ավելի կարևոր, քան ուսումնական տարվա հետ կապված իր հոգսերն ու մտահոգությունները:
Արմեն Աշոտյանն անդրադարձավ նաև այն լուրերին, որ ինքը Տիգրան Սարգսյանի կադրերից է, և որ վատ հարաբերությունների մեջ է Հովիկ Աբրահամյանի հետ: «Այնքան հաճելի է ութերորդ անգամ լսել մի բան, որ իրականությանը չի համապատասխանել ի սկզբանե: Ես Տիգրան Սարգսյանի կադրերից չեմ, ես Հանրապետական կուսակցության կադրերից եմ: ՀՀԿ կադրեր են բոլոր այն մարդիկ, ովքեր աշխատում են պետական համակարգում: Չկա Հովիկ Աբրահամյանի կադր, Տիգրան Սարգսյանի կադրեր: Եթե շատ եք ուզում անվանարկել կադրերին, ապա բոլորը Սերժ Սարգսյանի կադրերն են կամ այդպիսին են, կամ այդպիսին պետք է լինեն: Եթե շատ եք ուզում անունով կադրերին ձևակերպել, ապա բոլոր կադրերը հանրապետական լինելով՝ ո՛չ հովիկաբրահամյանական են, ո՛չ տիգրանսարգսյանական, բոլոր կադրերը սերժսարգսյանական են»,- ասաց նախարարը:
Ինչ վերաբերում է խոսակցություններին, որ իր և Հովիկ Աբրահամյանի հարաբերությունները վատ են, նախարարը նշեց. «Այդ հաճույքը մենք ձեզ չենք պատճառել և չենք պատճառելու: Մենք ունենք հրաշալի անձնական, սերտ աշխատանքային և ջերմ քաղաքական հարաբերություններ»,-ասաց նախարարը: