Nabucco նախագիծը հանված է օրակարգից, իսկ դրա վերակենդանացումը, կապված Ուկրաինայի իրադարձությունների հետ, իրական չի թվում, գրում է www.ng.ru-ն: Այդպիսին է Բաքվի արձագանքը արևմտյան ԶԼՄ-ներում հայտնված այն պնդումներին, թե ԱՄՆ-ի ու Իրանի հարաբերությունների ջերմացումը կարող է նպաստել այդ հարցի արդիականացմանը:
Հերթական աժիոտաժին այդ հարցում իր ներդրումն ունեցավ Իրանի նավթի փոխնախարար Ալի Մաջեդին, որը հայտարարել էր Թեհրանի պատրաստակամության մասին՝ ապահովել իրանական գազով ԵՄ երկրները:
Ադրբեջանի նավթային հետազոտությունների կենտրոնի ղեկավար Իլհամ Շաբանի խոսքով՝ արևմտյան ԶԼՄ-ների եզրակացություններն այդ թեմայով ոչ մի քննադատության չեն դիմանում:
«Դրանք անհիմն են այն պատճառով, որ Nabucco-ն արդեն հանված է օրակարգից, իսկ դրա վերակենդանացումը իրանական կողմի մասնակցությամբ տեսանելի ապագայում բացարձկապես անիրական է»,- հայտարարել է փորձագետը: Դրա ապացույցը Բաքվի որոշումն է վերաձևակերպել այդ նախագիծը TANAP գազատարում:
Nabucco գազատարը ենթադրում էր Եվրոպա գազամատակարարումներ Ադրբեջանից, Իրաքից և Թուրքմենստանից՝ շրջանցելով Ռուսաստանը: