«Յուրաքանչյուր զինվոր գիտի՝ ինչի համար է կռվում, օրինակ՝ ես եկել եմ այստեղ իմ ընտանիքը, տունը, հողը պաշտպանելու համար, վախենալու, անհանգստանալու պատճառ չկա, մեր մարտական դիրքերն ապահով են»,- «Առաջին լրատվական»-ի հետ զրույցում ասաց ԼՂՀ մարտական դիրքերից մեկի առաջնագծում սահմանը անառիկ պահող զինծառայող Կարեն Դավթյանը, ով օրերս պատվոգիր է ստացել հակառակորդի դիվերսիոն գործողություններին քաջաբար դիմագրավելու և ծառայությունը պատվով կատարելու համար:
Կարենը մինչ ծառայությունը հասցրել է ընդունվել իրավաբանական ֆակուլտետ: Ասում է՝ շատ կարևոր է, որ մեր զինվորները ոչ միայն քաջ են, այլև խելացի, լայն մտահորիզոնով, քանի որ մարտական գործողությունների ժամանակ կարևոր է գիտակցված, նպատակային քայլերով շարժվելը:
Մարտական դիրքում «Առաջին լրատվական»-ին զինծառայողները ցույց տվեցին ադրբեջանական այն դիրքերը, որոնց դիվերսիոն գործողությունները անհաջողության են մատնվել, և հպարտությամբ կրկնեցին, որ միշտ պատրաստ են հայրենիքի սահմանները պաշտպանել:
«Մեր հայ զինվորների դուխն այնքան բարձր է, որ մեր համար միևնույն է հակառակորդը ինչքան զենք ունի, մեկ ա՝ մենք մեր կյանքի գնով անգամ մեր հողերը պահելու ենք, հակառակորդը տեխնիկա ունի, բայց դուխ չունի»,- ասաց թնամու դիվերսիոն հարձակումը դիմագրաված հերոս զինծառայող Վոլոդյա Բեգլարյանը:
Վոլոդյան ընկերուհի ունի, մեր միջոցով ընկերուհուն փոխանցեց. «Թող հանգիստ լինի, սպասի իր ծառայող զինվորին», ապա հավելեց, որ սիրո խոսքեր ընկերուհուն հետո առանձին կասի:
Մեկ այլ սահմանապահ հերոս՝ Ավետիքյան Յուրին, իր հերթին բոլոր զինծառայողների ծնողներին հորդորեց հանգիստ և համբերատար լինել. «Հայ զինվորներին կոտրելն անհնար է, եթե պատերազմ լինի, միանշանակ ջախջախիչ հաղթանակ կտանենք»:
Առավել մանրամասն՝ մեր տեսանյութում: