Վրաստանի արտաքին գործերի նախարար Մայա Փանջիկիձեն Եվրամիության հետ Ասոցացման համաձայնագրի վավերացման գործընթացի դադարեցումը ԵՄ երկրների կողմից կապում է ամառային արձակուրդների հետ, գրում է Trend-ը:
«Փաստաթուղթը ստորագրելուց ի վեր մեկ ամիս, մի փոքր ավելի է անցել, սակայն այդ շրջանում երկրների մեծամասնության օրենսդիր մարմինները հանգստանում են, այդ պատճառով էլ այն հասցրել են վավերացնել միայն 4 երկիր: Դրանք են`Լատվիան, Լիտվան, Բուլղարիան, Ռումինիան: Վստահ եմ, որ այդ գործընթացը սեպտեմբերին կշարունակվի նաև մյուս երկրներում, և ես ենթադրում եմ, որ մինչև տարեվերջ երկրների բացարձակ մեծամասնությունը կվավերացնի համաձայնագիրը: Մենք շատ երկրների հետ ենք խորհրդակցություններ անցկացրել: Նրանց հայտնի է մեր դիրքորոշումը, և նրանք իրենք էլ կարծում են, որ այդ գործընթացը պետք է արագացվի: Ավստրիայի խորհրդարանի երկրորդ խոսնակը, ով այցով Թբիլիսիում էր գտնվում, խոստացել է, որ այդ երկիրը շատ արագ կվավերացնի համաձայնագիրը»,- հայտարարել է Փանջիկիձեն:
