Կանզաս Սիթիից միայնակ մայրը, ում մեքենան առևանգել էին, հիշելով, որ մեքենայի մեջ է մնացել իր հեռախոսը, որոշել է համոզել գողին վերադարձնել մեքենան, հաղորդում է KCTV-ն:
Մեգան Բրատտենն իր մեքենայի կորուստը հայտնաբերել է այն ժամանակ, երբ գնումներով դուրս է եկել խանութից: Հիշելով, որ մեքենայում է մնացել իր հեռախոսը, նա իր երկրորդ հեռախոսից մի քանի հաղորդագրություն է ուղարկել, որտեղ նկարագրել է իր դժվար կյանքը:
«Դուք հենց նոր գողացել եք հինգ երեխաների մոր ֆուրգոնը: Դուք կործանում եք իմ կյանքը»,- գրել է նա առաջին հաղորդագրության մեջ: Մի քանի ժամվա ընթացքում, կինը մեքենան առևանգողին մի քանի անպատասխան հաղորդագրություններ է ուղարկել:
Որոշ ժամանակ անց, կնոջ հեռախոսին հաղորդագրություն է ստացվել, որտեղ մանրամասն նկարագրվել է, թե որտեղ է կանգնած գողացված ֆուրգոնը: Կինը մեքենայի հետևից գնացել է մոր և շան ուղեկցությամբ: Երբ նա գտել է իր ֆուրգոնը, այլևս առևանգողին չի գրել: Բրատտենը ոստիկանությանը չի դիմել:
