«Հանդիպման կայացումն ինքնին կարևոր փաստ էր: Մինչ այդ եղել են հանդիպման բազմաթիվ առաջարկներ. Օլանդի առաջարկը՝ հանդիպել Փարիզում, ամերիկյան առաջարկը՝ ՄԱԿ-ի Գլխավոր ասամբլեայի ժամանակ, բայց փաստորեն այս բոլոր առաջարկները չմշակած, չքննարկած, չընդունած՝ անմիջապես երկու կողմն էլ ընդունեցին Պուտինի առաջարկը: Սա նշանակում է, որ Պուտինը մեկ անգամ ևս ցույց տվեց, որ ինքն է ուզում լինել Ղարաբաղյան կարգավորման կառավարիչը»,- «Առաջին լրատվական»-ի հետ զրույցում ասաց Քաղաքական և միջազգային հետազոտությունների հայկական կենտրոնի տնօրեն, քաղաքական վերլուծաբան Աղասի Ենոքյանը՝ անդրադառնալով Սոչիում կայացած Հայաստանի, Ադրբեջանի և Ռուսաստանի նախագահների հանդիպմանը՝ հավելելով, որ 2-րդ կարևոր արդյունքն այն է, որ Պուտինը այստեղ, ըստ էության, հնչեցրեց իր ցանկությունը:
«Բավականին հստակ արտահայտվեց այն մասին, որ Մինսկի խումբը միակ հարթակը չէ, որտեղ կարող է քննարկվել Ղարաբաղյան հակամարտության լուծումը, և հնարավոր են նաև այլ մոտեցումներ: Այլ մոտեցումներ ասելով՝ ես կարծում եմ, ինքը նկատի ուներ հենց իրեն»,- մանրամասնեց քաղաքական վերլուծաբանը:
Ըստ նրա՝ այս ամենը խոսում է Ռուսաստանի և Ադրբեջանի ջանքերի մասին՝ հարցը հանել Մինսկի խմբի ձևաչափից, բայց բացի այս երկու կողմերից և Հայաստանից՝ կան նաև այլ կողմեր՝ Մինսկի խմբի մյուս համանախագահ երկրները: Ուստի Աղասի Ենոքյանը չի կարծում, որ նրանք այդքան հանգիստ թույլ կտան հարցը այլ ձևաչափով՝ Ռուսաստանի մենեջմենթով լուծել:
«Մենք պետք է անենք այն, ինչ որ արեց Սերժ Սարգսյանը այս հանդիպման ժամանակ, այսինքն՝ նա բազմիցս հնչեցրեց Մինսկի խմբի մասին, Մադրիդյան սկզբունքների մասին, կարծում եմ ՝ Ամերիկան և Ֆրանսիան էլ իրենց մոտեցումները կներկայացնեն, որը ցույց կտա՝ արդյոք իրենք ի վիճակի՞ են պահպանել ֆորմատը, թե՞ ոչ»,- հավելեց Ա. Ենոքյանը:
Քաղաքական վերլուծաբանը նաև ընդգծեց, որ իրենից մեծ վտանգ է ներկայացնում այն, որ Լավրովը, խոսելով խնդրի կարգավորման մասին՝ որպես կարևոր սկզբունքի, ներկայացրեց տարածքային ամբողջականությունը և ազգերի ինքնորոշման իրավունքը, սակայն ոչինչ չասվեց հրադադարի ռեժիմի պահպանման մասին. «Սա բացահայտում է այն մեթոդը, որը ՌԴ-ն հենց վերջին շրջանում օգտագործեց հենց այս հանդիպումը կազմակերպելու համար: Չի բացառվում, որ այս սահմանային սրացումները լինեն ռուսական կողմի սադրանքի արդյունք: Ես կարծում եմ՝ Ռուսաստանը դեռևս կշարունակի օգտագործել այդ գործիքը, բայց ես կարևորում եմ այն, որ Հայաստանի նախագահը հստակորեն նշեց, որ իր և կարգավորման համար շատ կարևոր է հրադադարի ռեժիմի պահպանումը, շատ կարևոր է ուժի կիրառման և դրա սպառնալիքի բացառումը»:
Աղասի Ենոքյանի կարծիքով՝ ամբողջ խնդիրն այն է, որ ՌԴ-ն այս տարածաշրջանում ցանկանում է ռուս խաղաղապահներ տեղակայել, ինչը կբարձրացնի իր դերակատարությունը:
Առավել մանրամասն՝ տեսանյութում: