ԱՄՆ Գուանտանամո բանտի կալանավոր Էմադ Հասանը նամակով դիմել է դատավոր Գլեդիս Քեսլերին՝ խնդրելով դադարեցնել հարկադրաբար կերակրումը: Այդ դատավորը չի քննում նրա գործը, սակայն կալանավորների շրջանում հայտնի է նրանով, որ նմանատիպ մի քանի որոշումներ է կայացրել: Կալանավորը նաև նրան խնդրել է իրեն ուղարկել «Գահերի խաղը»: Այս մասին գրում է VICE News պարբերականը:
«Ձերդ մեծություն, դուք մարդ եք, Դուք որևէ մեկին թույլ կտայի՞ք ձեզ նվաստացնել, թքել ձեր երեսին կամ ստորացնել ձեր արժանապատվությունը: Մտածե՛ք այդ մասին»,- իր նամակում գրել է կալանավոր, Եմենի քաղաքացի Էմադ Հասանը:
Կալանավորի փաստաբան Ալկա Փրադհանը հայտնել է, որ սա աննախադեպ դեպք է:
«Այդ նամակի նպատակն է դատավոր Քեսլերին հիշեցնել, որ նա գործ ունի իրական մարդու հետ՝ մարմնից և արյունից»,- կարծում է Փրադհանը:
Նամակում Հասանը պատմում է կալանավորների մասին, որոնց սպառնում են ուտելուց հրաժարվելու դեպքում: Փաստաբանի խոսքով՝ ամեն անգամ, երբ նոր բանտապետ է հայտնվում, բանտում կենսական պայմանները խստանում են: