Իրադրությունը Իրաքում, որտեղ գրոհայինների դեմ փաստացի քաղաքացիական պատերազմ է գնում, նույնիսկ Ուրազա-բայամի տոնակատարության օրը լարված է մնում: Ինչպես հաղորդում է Reuters գործակալությունը՝ Բաղդադում ոստիկանները քաղաքի տարբեր թաղամասերում 15 դիակ են հայտնաբերել: Իրաքի մայրաքաղաքի ոստիկանության տվյալներով՝ դրանք «աղանդավորական» սպանություններ են եղել, ինչը վկայում է սունիների և շիաների միջև մեծացող անդունդի մասին:
Բաղդադում հայտնաբերված դիակների մեջ 25-30 տարեկան երեք կին են եղել, որոնց գլխից գնդակահարել են: Իրավապահ մարմիններում գործակալության աղբյուրների խոսքերով՝ մահից առաջ նրանց ձեռնաշղթաներով կապել են շիաների Սադր-Սիթի թաղամասից հյուսիս գտնվող արտադրական տարածքում: Ոսիկանությունը նշում է, որ սպանությունները գրոհայինների «ոճով» են կատարվել:
Շատերը հակված են մտածելու, որ կրոնական հողի վրա շարունակվող սպանությունները հետևանքն են վարչապետ Նուրի Ալ-Մալիքիի վարած քաղաքականության, որը պատկանում է շիաների համայնքին: Նշենք, որ Իրաքի հյուսիսում կառավարական զորքերի դեմ պայքարում են հիմնականում սունի ծայրահեղականները: Հարկ է նշել, որ շատ սունիներ չեն կիսում ահաբեկիչների մեթոդները, սակայն այնքան են դեմ Ալ-Մալիքիին, որ պատրաստ են միավորվել ահաբեկիչների հետ:
Ներկա պահին իրադրությունը բարդանում է նրանով, որ գրոհայինները մոտենում են Բաղդադին:
Վերլուծաբանների կարծիքով՝ Նուրի ալ-Մալիքիի դիրքերը, որը փորձում է արդեն երրորդ անգամ պահել վարչապետի աթոռը, կայուն չեն: Ջոն Քերիի Իրաք կատարած այցելությունը վարչապետի համար առաջին ահազանգն էր: ԱՄՆ-ում համոզված են, որ Իրաքում հարկավոր է իշխանությունների «վերաբեռնում» իրականացնել, որի կապակցությամբ Ալ-Մալիքին պետք է համաձայնի իշխանությունը զիջել ավելի գործունյա կառավարության, որը կկարողանա կանգնեցնել երկրի մասնատումը և իսլամիստ գրոհայիններին:
