Իրաքի խորհրդարանը փորձում է այսօր ընտրել երկրի նոր նախագահ, որը պետք է փոխարինի գործող նախագահ Ջելալ Թալաբանիին՝ գրում է Ria Novosti-ն:
Իրաքի հիմնական օրենքի համաձայն՝ պետության ղեկավարին ընտրում են խորհրդարանականները: Իր հերթին նախագահը վարչապետի թեկնածությունը առաջադրում է խորհրդարանական մեծամասնությունից, որը ձևավորում է կառավարությունը և փաստացի ղեկավարում երկրի գործադիր իշխանությունը:
Ինչպես կանխատեսում են ԶԼՄ-ները, քվեարկությունը հեշտ չի լինի: Բանն այն է, որ ոչ հստակ ընթացակարգի պատճառով իրենց թեկնածությունն են առաջադրել տասնյակ իրաքցիներ, և պատգամավորները ստիպված կլինեն քննարկել դրանք:
Ոչ պաշտոնական պայմանավորվածության համաձայն՝ Իրաքում նախագահի պաշտոնը կզբաղեցնի քրդերի ներկայացուցիչը: Քրդերը առաջադրել են երկու թեկնածու, քանի որ չեն կարողացել համաձայնության գալ միասնական թեկնածուի շուրջ: Այսպես. երկրի ղեկավարի պաշտոնին հավակնում են նախկին փոխվարչապետ, դաշնային կառավարությունում պլանավորման նախարար և Իրաքյան Քրդստանի նախկին վարչապետ Բարհամ Սալեհը: Մյուս թեկնածուն խորհրդարանի պատգամավոր է՝ Բաղդադից, Քրդստանի հայրենասիրական միության առաջնորդ Ֆուադ Մաասումը:
