Նորվեգացի Անդերս Բրեյվիկը, որի զոհերն էին դարձել տասնյակ մարդիկ, հրաժարվել է իր նպատակին բռնության միջոցով հասնելուց և կոչ է արել մյուս մարդկանց հետևել իր օրինակին:
Ժամանակին իր գործողությունները ահաբեկիչը բացատրել էր նրանով, որ փորձում է պայքարել «Եվրոպայի իսլամացման» դեմ, ցանկացել է իշխող կուսակցության ուշադրությունը հրավիրել այն փաստին, թե ինչ հետևանքներ կարող է ունենալ միգրացիոն մեղմ քաղաքականությունը: «Այժմ նա հասկացնում է, որ հրաժարվում է բռնությունից և կոչ է անում բոլորին այդպիսի գործողություններ չկատարել»,- նորվեգացու փաստաբան Թուրա Յորդետի խոսքերն է մեջբերում RIA Novosti-ն:
Փաստաբանի հայտարարությունն արվել է երեքշաբթի օրը, երբ ամբողջ Նորվեգիայով մեկ զոհերի հիշատակին նվիրված սգո արարողություններ են անցկացվում:
Հիշեցնենք, որ 2012 թ. օգոստոսին Անդերս Բրեյվիկը 21 տարվա ազատազրկման է դատապարտվել, որը Նորվեգիայում գործող խստագույն պատիժն է: Նա մեղավոր է ճանաչվել 2011 թ. հուլիսի 22-ին Օսլոյում և Ուտոյա կղզում 77 մարդու սպանության մեջ:
