Ադրբեջանցի դիվերսանտների ներթափանցման արդյունքում հայ սպայի և 17-ամյա պատանու սպանությունից, 37-ամյա կնոջ ծանր վիրավորումից հետո մեղադրանքներ են հնչում, որ ազգային անվտանգությունը, բանակը քնած են եղել, եթե դիվերսանտները կարողացել են այդքան ժամանակ ազատ շրջել, մարդ սպանել ու վիրավորել:
Այսօր ՊՆ կենտրոնական հավաքակայանում «Առաջին լրատվական»-ի հարցին` ինչպե՞ս է գնահատում ԱԱԾ-ի և բանակի գործողությունները՝ դիվերսանտներին հայտնաբերելու ուղղությամբ, ովքեր մոտ 10 օր շրջել ու մարդ են սպանել Հայաստանում, պաշտպանության նախարար Սեյրան Օհանյանն ասաց. «Միանգամից ասեմ, որ նրանք Հայաստանի տարածքում չեն եղել: Տեղում աշխատել են ԼՂՀ պաշտպանության բանակի և ԼՂՀ անվտանգության աշխատակիցները, իհարկե` համագործակցելով ՀՀ սահմանային բնակավայրերի և նման աշխատակիցների, հայկական բանակի ստորաբաժանումների հետ: Կարծում եմ, որ որոնումները կազմակերպվել են բավական բարձր մակարդակով և շատ կարճ ժամանակահատվածում ենք մենք կարողացել նրանց ձերբակալել: Նախկինում այդպիսի երևույթների կասկածներ եղել են, բայց որևիցե հայտնաբերում, ձերբակալում չի եղել: Ամսի 8-ից սկսած մինչև ամսի 11-ը բոլորը ձերբակալվել են: 4-5 օրվա ընթացքում այդպիսի խնդիր կատարել, այդ տարածաշրջանն ամբողջությամբ ուսումնասիրել, ամբողջությամբ որոնումներ իրականացնել, բավականին բարդ գործընթաց է, և գտնում եմ, որ բանակի և ԱԱԾ աշխատակիցների համագործակցությունը այսօր բավական բարձր մակարդակի վրա է»:
Սեյրան Օհանյանը նաև հավելեց. «Մեր հրամանատարների հմուտ գործողությունների արդյունքում է, որ տարբեր իրավիճակներում կարողանում ենք ճիշտ որոշում ընդունել ու վնասազերծել հակառակորդին»:
Ինչ վերաբերում է օրերս հայտնաբերված 17-ամյա պատանու սպանությանը, ապա նախարարի խոսքերով՝ նախնական վարկածով՝ «դիվերսիոն խմբի ձերբակալված վերջին անդամն է իրականացրել 17-ամյա պատանու սպանությունը»: Մանրամասները, ըստ նախարարի, վերջնականապես կպարզվեն քրեական գործի նախաքննությամբ:
Դիվերսիոն խումբը այլ հանցագործություններ կատարել է, թե ոչ` ըստ նախարարի, տեղեկություններ չկան: Ի՞նչ երաշխիք կա, որ ամբողջ խումբն է հայտնաբերվել` հարցին ի պատասխան Սեյրան Օհանյանն ասաց, որ հետորոնողական միջոցառումներ են իրականացնում, որ նման բաները բացառվեն:
Ադրբեջանն արդեն դիմել է Կարմիր խաչին և փորձում է ռազմագերու կարգավիճակ տալ դիվերսանտներին: «Սակայն ԼՂՀ ղեկավարության և մեր տեսակետն այն է, որ նրանք վարձկան հանցագործներ են, և այդ հանցագործները պետք է պատժվեն ԼՂՀ օրենքներով»,- ասաց նախարարը՝ հավելելով, որ ադրբեջանցիները պետք է պատասխան տան երկու սպանության և զինծառայողի կնոջը ծանր վիրավորելու համար: «Այսօր հնչում են կարծիքներ, որ դիվերսանտը պետք է լինի երիտասարդ, ընդհակառակը` այդպիսի դեպքերում ընտրվում են պատերազմ անցած և տարիքով անձնավորություններ, տեղանքը լավ իմացող: Նրանց հանդերձանքն էլ է ապացուցում, որ հատուկ պատրաստված ստորաբաժանումների ներկայացուցիչներ են»,- ասաց Օհանյանը:
Լեռնային Ղարաբաղ ներթափանցելուց հետո նկարահանած կադրերում դիվերսանտները հայտարարել էին, որ գողությունը իրենց պապական մասնագիտությունն է: «Անասնագողեր են, թե չէ` չեմ կարող ասել, իրենց մոտ միշտ էլ գողությունը կա»,- այդ կապակցությամբ մեր հարցին ի պատասխան ասաց նախարարը:
Մամուլում տեղեկություն կա, որ Վարդենիսում ու Քարվաճառում որոշակի խուճապ կա բնակչության շրջանում: «Ես գտնում եմ, որ այսօր Վարդենիսում և Քարվաճառում խուճապ չկա»,- վստահեցրեց նախարարը:
Նրա խոսքերով՝ ՊՆ-ն այսօր քննարկում է հարցը, որ սահմաններում բնակվող պայմանագրային զինծառայողները տանը զենք-զինամթերք ունենան, որ նման դեպքերում կիրառեն:
