Թուրքական Hürriyet թերթը հաղորդում է, որ երեկ Բրյուսելում կայացել է ՆԱՏՕ-ի խորհրդրի նիստը, որին մասնակցել է նաև ՆԱՏՕ-ում Թուրքիայի մշտական ներկայացուցիչ Հայդար Բերկը: Վերջինս իր ելույթում նշել է, որ թուրքական իշխանությունները դեմ են, առանց ՄԱԿ ԱԽ նիստի թույլտվության, ՆԱՏՕ-ի Լիբիա ներխուժմանը:
Նա նաև ՆԱՏՕ-ի անդամ երկրներին կոչ է արել չշտապել Լիբիայի շուրջ որոշումներ կայացնելիս. «Լիբիայում դեռևս ոչինչ հստակ չէ: Դա վերաբերում է թե՛ Քադաֆիին, թե՛ ընդդիմությանը: Եթե ՆԱՏՕ-ն ներխուժի Լիբիա, ապա հակամարտության մեջ կմտնի լիբիական ժողովրդի հետ: Աֆղանստանում վերապրած իրադարձությունների պատճառով իսլամական աշխարհում բացասական պատկերացում է ձևավորվել ՆԱՏՕ-ի հանդեպ: Եթե ՆԱՏՕ-ն Լիբիայում էլ հայտնվի փակուղային իրավիճակում, ապա այս անգամ նա արդեն լրջորեն կհեղինակազրկվի: Պետք չէ շտապել»:
Հիշեցնենք, որ Թուրքիան ՆԱՏՕ-ի անդամ միակ մահմեդական երկիրն է: Լիբիայի առնչությամբ պետք է նշել, որ Էրդողանը, ի տարբերություն Մուբարաքի, համեմատաբար բարյացակամ է տրամադրված Քադաֆիի հանդեպ, որից էլ ստացել է «Քադաֆիի անվան մարդու իրավունքների պաշտպանի մրցանակը»: Չպետք է մոռանալ, որ Մուբարաքը չէր սիրում Թուրքիային` վերջինիս դիտարկելով որպես մրցակից իսլամական աշխարհում: