Թուրքական «Zaman» թերթը հաղորդում է, որ Թուրքիայի գլխավոր ընդդիմադիր ուժ հանդիսացող Ժողովրդա-հանրապետական կուսակցության ներկայացուցիչ, Իզմիրից ընտրված կին խորհրդարանական Ջանան Արըթմանը մարտի 8-ի կապակցությամբ թուրքական խորհրդարանում սև ծաղկեպսակ է դրել վարչապետ Էրդողանի աթոռին, որի վրա նշված է եղել՝ «Ցանկանում ենք ապրել»:
Արըթմանը նշել է. «Էրդողանի գլխավորած «Արդարություն և զարգացում» կուսակցության իշխանության տարիներին (2002 թվականի նոյեմբերից) Թուրքիայում սպանվել է շուրջ 5,000 կին: Թուրք կանայք արդեն պայքարում են ոչ թե իրենց իրավունքների, այլ պարզապես գոյատևման համար: Նրանք անուժ են դարձել, մոտ չորս միլիոն կին գրել-կարդալ չգիտի»:
Այդ ամենը հարուցել է Էրդողանի համակիրների զայրույթը, և լարվածության թուլացման նպատակով թուրքական մեջլիսում հինգ րոպեանոց ընդմիջում է հայտարարվել:
Հիշեցնենք, որ Արըթմանը հայտնի է իշխող կուսակցության վերնախավի հասցեին հնչեցրած իր սկանդալային հայտարարություններով: Մասնավորապես, երբ 2008 թվականի դեկտեմբերի կեսերին Գյուլը դրական գնահատեց մի խումբ թուրք մտավորականների նախաձեռնությամբ 1915 թվականի իրադարձությունների համար հայերից ներողություն հայցելու ստորագրահավաքը, Ջանան Արըթմանը հանդես եկավ Գյուլի մոր հայկական ծագման վերաբերյալ հայտարարությամբ:
Սակայն Գյուլը նախ հրապարակավ ասաց, որ իրենց տոհմը թուրք է և մուսուլման, այնուհետև մամուլում տպագրվեց Գյուլի ընտանեկան տոհմածառը (վերջերս էլ նշվեց, որ Գյուլի հայրն ամուսնացել է իր մորաքրոջ աղջկա հետ): 2009 թվականի գարնանը Թուրքիայի նախագահը դատի տվեց Արըթմանին և շահեց դատը` ստանալով խորհրդանշական 1 թուրքական լիրա փոխհատուցում:
Իսկ ահա 2009 թվականի աշնանը, երբ թուրքական խորհրդարանը քննարկում էր Էրդողանի առաջ քաշած «Քրդական նախաձեռնությունները» (բարեփոխումները), Արըթմանը, նկատի ունենալով նախագահ Գյուլի կնոջ մուսուլմանական հագուստը և գլխաշորը, հայտարարեց. «Տեսա՞ք, թե Գյուլի կինը վերջին անգամ ինչ հագուստ էր կրում: Միայն միանձնուհիներն են կրում այդպիսի հագուստ: Եթե ասեմ, որ Գյուլի կինը նման է պինգվինի, ապա պինգվիններին վիրավորած կլինեմ»: