Վերջին զարգացումները Սիրիայում, այդ թվում` պետական երկու բարձրաստիճան պաշտոնյաների անցումն ապստամբների կողմը, Դամասկոսում սկսված արյունալի բախումները, վկայում են, որ Բաշար Ալ-Ասադի վրա բանեցվող ճնշումը մեծանում է, և կառավարությունն ի վիճակի չէ դիմակայելու այդ ճնշմանը։ Այս մասին հայտարարել է ԱՄՆ պետքարտուղարը՝ BBC-ին տված հարցազրույցում։
Լրագրողի հետ զրույցի ժամանակ ամերիկյան արտաքին գերատեսչության ղեկավարը հերքել է այն տեղեկությունները, համաձայն որոնց՝ Արևմուտքը չի ցանկանում վճռական քայլերի դիմել Սիրիայի հարցով, իսկ այդ ամենի մեղքը գցում է Չինաստանի և Ռուսաստանի վրա` պատճառաբանելով նրանց կոշտ դիրքորոշմամբ։ Քլինթոնի կարծիքով՝ եթե պաշտոնական Պեկինն ու Մոսկվան ՄԱԿ-ում դրսևորեին կամք և ճնշում գործադրեին Ալ-Ասադի կառավարության վրա, ապա արդյունքն այլ կլիներ։
Միաժամանակ պետքարտուղարը կարծիք է հայտնել, որ Սիրիայում իշխանության խաղաղ փոխանցման համար դեռևս ժամանակ կա՝ չնայած Միջազգային կարմիր խաչն այդ երկրում տեղի ունեցողը որակել է որպես քաղաքացիական պատերազմ։
