Ներկոալիցիոն խնդիրների հանգուցալուծումը կտրվի այսօր երեկոյան կայանալիք Հայաստանի կառավարող կոալիցիայի նիստին, որի ընթացքում հստակեցվելու է կառավարող ուժերի դիրքորոշումը կոալիցիոն նոր հուշագրի վերաբերյալ:
Նշենք, որ Սերժ Սարգսյանը վստահ չէ, որ կոալիցիայի անդամ կուսակցությունները իրեն են սատարելու 2013-ի նախագահական ընտրությունների ժամանակ և ցանկանում է համոզվել դրանում:
Հայ ազգային կոնգրեսի կենտրոնական գրասենյակի համակարգող Լևոն Զուրաբյանի կարծիքով, այդպես Սերժ Սարգսյանը փորձում է մինչև նախագահի ընտրություններ ամրապնդել իր դիրքերը.
«Իսկ մի՞թե այնտեղ այնպիսի հարաբերություններ են, որ իրար վստահեն: Կոալիցիային գաղափարները չեն միավորել, այլ՝ քրեական դաշտը, իսկ քրեական դաշտում իրար երբեք չեն վստահում»:
Զուրաբյանի խոսքերով, ակնհայտ է, որ Սերժ Սարգսյանն առաջիկայում չի կարող հույս դնել իր ուժերի ու հեղինակության վրա.
«Ուստի նա այս գլխից պետք է նման քայլերի դիմի: Այսինքն՝ եթե կոալիցիայում չկա գաղափարական կապ, հեղինակություն, լոյալությունն այլ միջոցով է ապահովվելու՝ սպառնալիքով, կերակրատաշտից զրկելու վախով, կաշառելով: Ու դա պետք է նա հիմա անի»:
