Սյունեցի 3 հազար աշակերտներ 4 օրում իրենց գիտելիքները կստուգեն 16 առարկաներից: Մեկնարկել է դպրոցականների առարկայական օլիմպիադայի տարածքային փուլը:
Օլիմպիադայի առաջին օրը աշակերտներն իրենց գիտելիքները չափեցին մաթեմատիկա, կենսաբանություն, պատմություն առարկաներից: Մասնագետները դժգոհում են, որ ամեն տարի մի նոր առարկա է ավելանում, սակայն աշակերտների գիտելիքների մակարդակը տարեցտարի իջնում է: Այս տարի ավելացել է ՆԶՊ-ն:
«Նախկինում օլիմպիադային մասնակցում էին դպրոցում լավագույն առաջադիմություն ունեցող երեխաները, հիմա նույնիսկ միջակ ունակությունների տեր աշակերտն է գալիս»,- ասում է օլիմպիադայի պատասխանատու քարտուղար, Սյունիքի մարզպետարանի կրթության վարչության գլխավոր մասնագետ Նորա Ասատրյանը:
Վերջինիս կարծիքով, երեխաները փորձում են` թե կանցնեն, լավ: Մաթեմատիկայի ուսուցիչ Կարո Բաբայանի ասելով՝ մաթեմատիկայի թեստերը բավականին բարդ են, խնդիրները մատչելի չեն: Վերջինիս համոզմամբ, պետք է օլիմպիադայի հարցերը աշակերտներին հետաքրքրեն: Իսկ կենսաբանության ուսուցչուհի Անահիտ Սիմոնյանի խոսքով, իր առարկայի հանդեպ հետաքրքրությունը գնալով նվազում է: «Աշակերտները երկար չեն մտածում, արագ ավարտում են գրավորները, այսինքն՝ լուրջ չեն վերաբերվում օլիմպիադային»,- ասում է տիկին Սիմոնյանը:
Ի դեպ, տարածքային փուլի հարցաշարերը կազմել են մարզպետարանի կրթության վարչության մասնագետները` ԿԳ նախարարության չափանիշներով: Բայց մասնագետները մի բան էլ են նկատել. տարածքայինի հարցաշարերը ավելի բարդ են լինում, քան մարզայինը: Սրանք կազմվում են նախարարությունում:
Ամեն դեպքում, հարցը վիճելի է, կրթության վարչության պետ Լյուդվիգ Հարությունյանն էլ համոզված է, որ բարդ ու հեշտ չկա. ունակ աշակերտը պիտի կարողանա հաղթահարել արգելքները:
