«Այն խնդիրները, որոնք այսօր ունի հայկական եթերը, Արևմուտքում եղել են դեռևս 30-40 տարի առաջ»,- այսօր լրագրողների հետ հանդիպմանը ասաց սոցիոլոգ, «Հեռուստաեթերի մաքրման պահանջ» նախաձեռնության անդամ Վահրամ Միրաքյանը:
Բանախոսի հավաստմամբ` եթերով ցուցադրվող բռնությունները, ամեն օր ցուցադրվող ագրեսիան հասարակության շրջանում առաջացնում են անդառնալի հետևանքներ. «Մի քանի օր առաջ «Հարսնաքարում» ծեծկռտուք եղավ, որտեղ թիկնապահը ծեծեց հայոց բանակի սպային: Թիկնապահը բացասական կերպար է այստեղ, մինչդեռ ամեն օր սերիալներում ներկայանում է որպես բարի, օրինապաշտ: Իսկ սպաներին անընդհատ ծաղրում են: Մենք անցել ենք հակազգային սահմանները, մոտենում ենք հակամարդկայինին»:
Հեռուստատեսության և ռադիոյի ազգային հանձնաժողովի (ՀՌԱՀ) նախագահի տեղակալ Ժիրայր Դադասյանն էլ ասաց, որ դեռևս երկու տարի առաջ տեղի են ունեցել չափորոշիչների մշակման գործընթացներ, ընդունվել է համապատասխան օրենք, որն այսօր չի կիրառվում. «ԱԺ-ն պետք է ձեռնամուխ լինի այս հարցը նորից քննարկելու, պիտի օրենքով ամրագրվի, որ սեռական տեսարաններ, բռնություն պարունակող ֆիլմերը ցուցադրվեն գիշերվա ժամը 12-ից մինչև առավոտյան 6-ը»:
Նա հավելեց նաև, որ սերիալը հեռուստատեսության մաս է, և հնարավոր չէ այն ընդհանրապես արգելել:
«Հեռուստաեթերի մաքրման պահանջ» նախաձեռնության նախագահ Զաքար Խոջաբաղյանի կարծիքով՝ պետք է արգելվեն և եթեր չհեռարձակվեն հայ կնոջը, ընտանիքը վարկաբեկող սերիալները, հումորային և նմանատիպ այլ հաղորդումները:
Վերջում Վահրամ Միրաքյանն ասաց, որ հեռուստաեթերի մաքրման համար անհրաժեշտ է ստեղծել վերլուծական կենտրոն, աջակցել ՀՌԱՀ-ին, որպեսզի հարցը լուծվի արագ և որակով:
