Յուրաքանչյուր քաղաքական անձի կամ բիզնեսմենի համար շատ հաճելի կլիներ, եթե թիկնապահներ չունենար, բայց շատ կարևոր է անվտանգության հարցը: Այսօր լրագրողների հետ հանդիպման ժամանակ նման տեսակետ հայտնեց ՀՀԿ խմբակցության ղեկավար Գալուստ Սահակյանը` նշելով, որ օրենքը կա, մինչև 2013 թ. հունվարի 1-ը ենթաօրենսդրական դաշտը կստեղծվի և կկարգավորվի օրենքի ուժով: «Ցանկացած նման երևույթ մերժելի է, դատապարտելի»,- ասաց Գ.Սահակյանը:
Ինչ վերաբերում է «Հարսնաքարի» հայտնի միջադեպին, ըստ Գ. Սահակյանի՝ հանցագործությունը չի կարելի կապել անվտանգության ծառայության հետ, և Ռուբեն Հայրապետյանի թիկնազորի աշխատակիցները չեն, որ ծեծել են զինվորական բժշկին. «Օրենքի շրջանակներում ամենայն խստությամբ պատժվելու են այդ գործողությունները կատարողները: Բանակի զինվորի դեմ դա ավելի դատապարտելի է»:
Նրա խոսքով՝ մարդիկ փորձում են իրենց համար արտոնյալ կարգավիճակ ստեղծել, որի դեմ միակ պայքարի ձևն այն է, որ պետք է օրենքը ամենայն խստությամբ գործի:
«Նման իրողությունների համար իր մեղքի բաժինն ունեն և Գալուստ Սահակյանը, և Ռուբեն Հայրապետյանը, և հասարակությունը»,- ասաց Գ. Սահակյանը` հավելելով, որ անձամբ ինքը թիկնապահ չունի և չի էլ պատրաստվում ունենալ:
Լուսանկարը՝ PanARMENIAN Photo-ի
