Երևանում մեկնարկել է Առևտրի և զարգացման սևծովյան բանկի (ԱԶՍԲ) բիզնես-համաժողովը, որին մասնակցում են բանկի անդամ երկրների, այդ թվում՝ Թուրքիայի պատվիրակությունները, բացի՝ Ադրբեջանից: Ինչպես նշեց ԱԶՍԲ նախագահ Անդրեյ Կոնդակովը, բիզնես-համաժողովի հիմնական նպատակն է ցուցադրել Հայաստանի առաջընթացը և ջատագովել աճն ու ներդրումները մեր երկրում՝ տարածաշրջանում խորացնելով բիզնես կապերը և կապերը իշխանությունների, բիզնեսների և միջազգային կառույցների միջև:
«Սևծովյան տարածաշրջանը 4% աճ ունի, գրավիչ է արտասահմանյան ներդրումների համար: Հայաստանը շատ լավ օրինակ է նմանօրինակ առաջընթացի»,- ասաց Ա. Կոնդակովը:
ՀՀ վարչապետ Տիգրան Սարգսյանը նշեց, որ ԱԶՍԲ-ն, 2004 թ. սկսած, Հայաստանում իրականացրել է մոտ 75 մլն դոլարի ծրագրեր: Նա ներկայացրեց ՀՀ կառավարության հնգամյա գործունեության ծրագիրը, որը երեկ հաստատվել էր ԱԺ-ում:
«Հայաստանը նպատակ ունի ձևավորել մրցունակ տնտեսություն, որը կունենա արտահանման լայն հնարավորություններ` մասնավոր-պետական հատված սկզբունքի հիման վրա»,- ասաց Տ. Սարգսյանը:
Նշենք, որ Հայաստանում ԱԶՍԲ-ի ակտիվ փաթեթը կազմում է 50.2 մլն եվրո, դիվերսիֆիկացված փաթեթը ուղղված է ագրոբիզնեսի արտադրության, մանրածախ առևտրի, ֆինանսական ոլորտում և ՓՄՁ աջակցության ոլորտում: Նախատեսվում է, որ 2011-2014 թթ. ԱԶՍԲ-ի ներդրման մասնակցությունը ՀՀ-ում աճելու է մոտ 50 մլն եվրոյով՝ կենտրոնանալով ենթակառուցվածքների և էներգիայի արդյունավետ օգտագործման, ՓՄՁ-ի և արտահանման խթանման վրա:
