«Հունիսի 14-ի երեկոյան Չարենցավանից դեպի Ալափարս տանող ճանապարհի ձախ հատվածում՝ դեռ ԽՍՀՄ տարիներից կառուցված, իսկ այժմ չգործող կաթսայատան ապամոնտաժման աշխատանքների ժամանակ մահացավ Չարենցավանի 23-ամյա բնակիչ Հովհաննես Բաբայանը»,- գրում է «Երկիր»-ը:
Շինության պատկանելիության և դեպքի վերաբերյալ թերթին մի քանի մանրամասներ են հայտնի դարձել:
«Մեր աղբյուրների փոխանցմամբ` կաթսայատունը պատկանել է Կոտայքի մարզպետ Կովալենկո Շահգալդյանի ընտանիքին, որն այն 5 տարի առաջ վաճառել է: Նոր սեփականատերն այս տարիների ընթացքում սեփական միջոցներով վաճառել է կաթսայատան ապամոնտաժումից առաջացած շինանյութը: «Բոնուսը» եղել է կաթսայատան 120 մետր երկարությամբ ծխնելույզը, որի ոչ ճիշտ ապամոնտաժումն էլ դարձավ դժբախտ պատահարի պատճառը: Ուշագրավ է, որ աղյուսե ծխնելույզի շինարարական ամրանի արժեքը մոտ 250-300 ԱՄՆ դոլար է:
Մեր տեղեկություններով` ծխնելույզը սկզբում ցանկացել են ապամոնտաժել պայթեցման եղանակո,վ բայց Շահգալդյանները սեփականատիրոջը զգուշացրել են, որ ապամոնտաժումն անաղմուկ կազմակերպի և որ ամենակարևորն է, այնպես, որ չվնասվի ծխնելույզից մոտ 50 մետր հեռավորության վրա գտնվող Շահգալդյանների ապակեպատ ջերմոցը: Շահգալդյանների ջերմոցը, իհարկե, հիմա տեղում է, բայց անվտանգության կանոնները չպահպանելու և ոչ գրագետ ապամոնտաժման պատճառով զոհվեց 23-ամյա մի երիտասարդ»:
