Անցյալ տարեվերջին, ՀՀ կառավարության որոշմամբ, Նուբարաշենի նախկին թիվ 18 հատուկ դպրոցը միացվել էր «Փոքր Մհեր» կրթահամալիրին, և դպրոցի աշխատակիցները կանգնած էին գործազուրկ դառնալու շեմին: ԿԳՆ լրատվականից տեղեկացնում են, որ ԿԳ նախարար Արմեն Աշոտյանը հանդիպել է հատուկ դպրոցի մանկավարժների հետ և վստահեցրել, որ ոչ մի մանկավարժ առանց աշխատանք չի մնա:
Աշոտյանը հավաստիացրել է, որ աշխատակազմից որևէ մեկը գործազուրկ չի դառնալու. «Փոքր Մհեր» ռազմամարզական կրթահամալիրի դեկավարության առջև խնդիր է դրված բոլորին ապահովել աշխատանքով։
Իսկ հատուկ դպրոցի աշակերտների ճակատագրի առնչությամբ ԿԳ նախարարն ասել է, որ դպրոցը նախատեսված էր հակասոցիալական վարք դրսևորած երեխաների համար, մինչդեռ այնտեղ ընդգրկված էին հիմնականում սոցիալապես անապահով ընտանիքների երեխաներ։ Նախարարը տեղեկացրել է նաև, որ մինչև այս ուսումնական տարվա ավարտը նրանք կշարունակեն ապրել նույն կերպ, իսկ ամռան ամիսներին կիրականացվի երեխաների կարիքների գնահատում, և յուրաքանչյուրի համար կտրվի համապատասխան լուծում:
Աշոտյանը նշել է, որ Նուբարաշենի թիվ 18 հատուկ դպրոցը փակելով՝ ցանկություն է եղել վերացնել վերջինիս շուրջ ծագած որոշ խնդիրներ: Բանն այն է, որ դպրոցը վատ համբավ է ունեցել, դրա գործունեության ընթացքում իրավապաշտպան, հասարակական և միջազգային կազմակերպություններից բազմիցս ահազանգեր են հնչել, տարաբնույթ դժգոհություններ են եղել։ Բացի այդ, դպրոցում ընդգրկված են եղել մեծ թվով ոչ պրոֆիլային երեխաներ։ Աշոտյանը տեղեկացրել է, որ քննարկումների արդյունքում որոշվել է ոչ թե փակել, այլ վերապրոֆիլավորել դպրոցը` դարձնելով ռազմահայրենասիրական ուղղվածության:
Նախարարը տեղեկացրել է նաև, որ «Փոքր Մհեր» ռազմամարզական կրթահամալիրի մասնաճյուղում առաջիկա երկու տարիների ընթացքում 250 միլիոն դրամի ներդրում է կատարվելու։
