Մարզերում «Հանրապետական» կուսակցության անդամների համար կուսակցության որոշումը նույն ձևի որոշում է` առանց որևէ քննարկման: Ինչ որոշել ա, ինչ որոշվի` արվելու է, խնդիր չեմ տեսնում: Այս մասին մեզ հետ զրույցում նշեց Սյունիքի մարզպետ Սուրեն Խաչատրյանը` անդրադառնալով մարզերում սպասվող կադրային փոփոխություններին:
– Երեկ հայաստանյան թերթերից մեկը հրապարակել էր տեղեկություն այն մասին, թե Ռուսաստանի «Միաբանություն» ազգային ակումբի նախագահ Սմբատ Կարախանյանը հայտարարել է, որ ՌԴ-ում հարուցված թմրաբիզնեսի քրեական գործերով անցնում եք նաև Դուք: Թերթի այն հարցին, թե ինչպե՞ս եք վերաբերվում այդ հայտարարությանը, Դուք ասել եք. «Դե, որ ասում ա, ուրեմն ճիշտ ա ասում, էլի»: Պարոն Խաչատրյան, ավելացնելու բան ունե՞ք:
– Նման խոսք չի եղել, որ ես ասեմ նման բան կա: Ընդհակառակը, մեկը ինձ ասել է, որ նման խոսակցություններ կան, ես ասել եմ` ով է եղել այդ խեղկատակը, որ նման բան է ասել: Ինձ ասացին, որ ասողը, իսկապես խեղկատակ է, նաև հարցրեցին, թե ես պատրա՞ստ եմ դրան դատի տալու, ասել եմ` այո, պատրաստ եմ: Ես ձեզ հիմա ասում եմ, որ դա հերյուրանք է, և եթե թերթը ունի այդ հնարավորությունը, կարող եք գրել, իմ կողմից ներկայացնել, որ դա հերյուրանք է:
– Այսինքն` Դուք պատրաստվում եք դատի տալ Ձեր բարի համբավը արատավորողին և պայքարել դատական ատյանների միջոցով:
– Բա ո՞նց չեմ պատրաստ, դրա հերը անիծած: Ասում ա` բա պատրաստ չե՞մ: Բա ես Մոսկվա, թմրաբիզնես, չգիտեմ` բա դրա հետ ես ի՞նչ կապ ունեմ:
– Ինչո՞վ եք պայմանավորում այս բարձրացված աղմուկը. Ձեր բարի համբավը արատավորելու միտում տեսնո՞ւմ եք:
– Բա էլ ուրիշ ի՞նչ կա, էտ ա: Այդ անասունը գիտի, որ ո՛չ ինձ ճանաչում է, ո՛չ էլ ես Մոսկվայում ընդհանրապես գործողություն կատարած չկամ, երբև է: Հասկանում եք, որ նա ոչ մի կերպ չի կարող դա հիմնավորի, էտ հայվանը: Պռոստը խայտառակում է մարդուն. սա է խնդիրը:
– Իսկ Դուք փորձե՞լ եք անձամբ Ձեր հարաբերությունները Սմբատ Կարախանյանի հետ պարզել:
– Բա ոնց չեմ փորձել: Բա, եթե համարը տաք, գոնե մի տվյալ տաք, ես նրա հետ ոչ թե կկապվեմ, այլ հերը կանիծեմ Մոսկվայում:
– Դուք առաջարկել եք Կապանում վաճառվող դեղորայքի գինը իջեցնել 10 տոկոսով… Իսկ մարզի դեղատներում վաճառվող դեղորայքի 80 տոկոսը ձեռք է բերվում հիմնականում «Ալֆա ֆարմ» և «Նատալի ֆարմ» ընկերություններից, որոնցից վերջինը պատկանում է Սամվել Ալեքսանյանին: Այս ամենը Սամվել Ալեքսանյանի հետ համաձայնեցրե՞լ եք: Մտահոգություն չունեք, որ այս պայքարը կանձնականացվի:
– Որոշումս պայմանավորված է ժողովրդի սոցիալական վիճակով: Ինչ վերաբերում է իմ և Սամվել Ալեքսանյանի պայքարին` չեմ կարծում, որովհետև մենք ընկերներ ենք, ի՞նչ անձնական խնդիր պետք է ունենանք:
– Այսինքն` Դուք ձեր որոշումը կանխավ Սամվել Ալեքսանյանի հետ համաձայնեցրել եք:
– Չէ, ես իրենց ներկայացուցիչին ասել եմ, որ զանգեն անձամբ իմ անունից ասեն, խնդրեն, որ 10 տոկոսով դեղերի գինը իջեցնեն: Հո մենակ Սամվել Ալեքսանյանը չի այնտեղ, «Նատալի ֆարմ» կա, չգիտեմ ինչ կա: Այսօր Կապանում, երևի տեղյակ եք, գործազրկությունը հանրապետությունից 1.9 անգամ ավելին է: Եվ սոցիալական վիճակն է ծանր, և իսկապես վիճակը վատ է: Հիմա ալյուրը թանկացավ, գոնե կարողացանք հացը հսկողության տակ պահել, որ շատ չթանկանա: Սնունդի տեսակներ կան, որ մարդիկ ամեն օր օգտագործում են, դա էլ ենք ասելու, որ մի քիչ էժանացնեն: Այսօրվանից սկսելու է այդ գործընթացը: Այստեղ Սամվել Ալեքսանյանի հետ անձնավորված խնդիր չկա: Այս ամենը ընդամենը ժողովրդի վիճակից ելնելով ենք անում:
– Վարկած կա, որ այս զեղչերը պայմանավորված են նախընտրական շրջանով: Ի՞նչ կասեք այս մասին:
– Չէ, ասեմ ձեզ` հացի և գների խնդիրը ես տարեկան երկու անգամ նայում եմ: Դեկտեմբեր-հունվար ամիսներին միշտ էլ ալյուրը թանկանում է, սակայն իրավիճակը հսկողության տակ ենք պահում, որ կալկուլացիայի մեջ տեղավորվեն և շատ չթանկանա: Հիմա, երբ հունիսին առաջին բերքահավաքը սկսեց թե չէ ալյուրը էժանանալու է, և այդ ժամանակ էլ էլի հացը մեր հսկողության տակ է լինելու, և էլի գները էժանացնելու ենք: Արդեն 15 տարի է այդ գործողությունը ես` և՛ քաղաքապետ եղած ժամանակ, և՛ մարզպետ եղած ժամանակ իրականացրել եմ: Յոթ տարիների ընթացքում ես ամեն տարի այդ գները վերանայում եմ: Հետև աբար դա նախընտրական շրջանի հետ ոչ մի կապ չունի: Գների վերահսկողությունը միշտ կատարվում է. խոսք կա` ասում են, չէ՞, մարդ կա ախորժակը ուտելուց է բացվում: Այս ամենը անում ենք, որ առև տրականները գները չափավոր պահեն: Չեմ ասում, որ առևտրականները շահույթ չունենան, բայց շահույթին էլ չափ կա, տոկոս կա: Պետք է չափի մեջ վերաբերվեն: Հետևաբար այն սննդատեսակները, որ մարդիկ ամեն օր իրենց տանը օգտագործում են` ձեթից բռնած, չգիտեմ կռուպեղեն է, խոսքս այդ ամեն ինչին վերաբերում է: Հիմա, եթե կոնյակը ուզում է, թող թանկ ծախի, ես ինչ գիտեմ` խմիչք ա, սիգարետ ա թող թանկ ծախի, քանի որ առաջին անհրաժեշտության ապրանք չի: Իսկ ինչ առաջին անհրաժեշտության է, խոսքս դրանց վերաբերում է: Ավելին, դրանց վերաբերյալ խորհրդակցությունները արվել ա, արվում ա: Մարզի տարածաշրջանում դրանք միշտ հսկելի են եղել և այսօր էլ մնում են հսկելի, որ շատ չթանկացվի:
– Վերջերս Տիգրան Կարապետյանը փորձում է սոցիալապես անապահով շերտերի ուժերով երկրում նոր քաղաքական ընդդիմադիր ուժ դառնալ: Դուք մտավախություն չունե՞ք, որ սոցիալական բունտը կարող է մարզեր հասնել:
– Սոցիալական խնդիրը մարզերում, համոզված եմ, որ պայքար չի դառնա և Տիգրան Կարապետյանն էլ, չեմ կարծում, որ եսիմ ինչ մի մեծ դեմք ա, որ ժողովուրդը Տիգրան Կարապետյանի խոսքի հետև ից գնա:
– Ի՞նչն է Ձեզ վստահություն ներշնչում, որ մարզերում ժողովրդական պայքարը սոցիալական պայքարի չի վերածվի:
– Դե, ես ձեզ մի բան ասեմ, որ սյունեցիները ինտելեկտուալ, լուրջ ժողովուրդ են, և այդքան էլ հեշտ չի, որ Տիգրան Կարապետյանը գա սյունեցիներին խաբի, իր հետևից տանի: Երևի թե այս 20 տարիների ընթացքում շատ-շատերն են փորձել սյունեցիներին ներգրավել իրենց անձնական խնդիրների մեջ, բայց համոզված եմ, որ դուք էլ տեսել եք, որ դա չի ստացվել: Սյունեցիք իրենց ծրագրերը, նպատակները, ապրելակերպը, խնդիրը ունեն և իրենց համար իրենց պետությունը թանկ է:
– Ի՞նչ նկատի ունեք նշելով ծրագիր, նպատակ, ապրելակերպ:
– Այսինքն` ինչ ներկայացնեմ: Այդ ինչ ներկայացնելու բան է, որ ես ներկայացնեմ: Դա այսօրվա որոշում չի: Սյունեցիքի որոշումը հազարամյակների խորքից է գալիս և գենետիկորեն սերնդեսերունդ փոխանցվում է պետության նկատմամբ ունեցած վերաբերմունքի, հարգանքի, պետականամետ լինելով, և հայրենիքը շատ սիրելու խնդիրն է: Դա մի օրով չի որոշվում:
– Վերջին շրջանում Սյունիքի մարզում իր դիրքերը ակտիվորեն ուժեղացնում է ԲՀԿ-ն: Ասում են, որ Ձեր հովանավորությունն էլ կա այս գործում, և Դուք չեք միջամտում այդ գործընթացին: Ի՞նչ կասեք այդ մասին:
– Ես ընդհանրապես, ոչ մի կուսակցության չեմ խոչընդոտում, քանի որ դա ժողովրդի կամքն է` կուզենա կմիանա այդ կուսակցությանը կամ կընդունի այդ կուսակցության գաղափարախոսությունը: Այդպես չի, որ ես որև է կուսակցության խոչընդոտում եմ կամ չեմ խոչընդոտում: Բայց չի կարող պատահել, որ իմ հովանավորությունը լինի այդ գործում: Ես այսօր ունեմ կուսակցություն, ես այսօր «Հանրապետական» կուսակցության մարզային խորհրդի նախագահն եմ: Եվ ասեմ ձեզ` այսօր շատ մեծ քանակությամբ մարդիկ ընդգրկվում են «Հանրապետական» կուսակցության շարքերը, և ես ընդամենը կարող եմ հովանի լինել և անել ամեն ինչ «Հանրապետական» կուսակցության համար:
– «Հանրապետական» կուսակցության ներսում տեղի ունեցող վերջին զարգացումները ցույց են տալիս, որ առաջիկայում կուսակցաշինության շահերից ելնելով պատգամավորները զտման փուլ են անցնելու, մտավախություն չունե՞ք, որ այդ քամին կհասնի մարզեր:
– Ուրեմն, «Հանրապետական» կուսակցության որոշումը նաև մարզերում «Հանրապետական» կուսակցության անդամների համար է որոշում:
– Այսինքն` չեք բացառում, որ մարզերում էլ առաջիկայում կադրային փոփոխություններ կլինեն:
– Ասում եմ` մարզերում «Հանրապետական» կուսակցության անդամների համար «Հանրապետական» կուսակցության որոշումը նույն ձևի որոշում է` առանց որևէ քննարկման: Ինչ որոշել ա, ինչ որոշվի` արվելու է, խնդիր չեմ տեսնում:
