Մայնի-Ֆրանկֆուրտի ոստիկանությունը մայիսի 18-ին ձերբակալել է 400-ից ոչ պակաս ցուցարարի, որոնք միտինգ էին անցկացնում քաղաքի ողջ կենտրոնում: Այդ մասին հայտնում է Associated Press գործակալությունը:
Տեղի իշխանությունների տեղեկություններով` երեկ «Գրավի՛ր Ֆրանկֆուրտը» ակցիային մասնակցել է շուրջ 1000 մարդ: Ձերբակալությունները սկսվել են այն բանից հետո, երբ ակտիվիստների մի մասը փորձել է բարիկադավորվել, կոտրել ճանապարհային նշաններն ու նստել ճանապարհների երթևեկելի մասերին:
Շարժման մասնակիցներն այդ եղանակով փորձում էին արգելափակել Ֆրանկֆուրտում տեղակայված Եվրոպական կենտրոնական բանկ (ԵԿԲ) տանող ճանապարհները:
Իշխանությունները փողոց էին դուրս բերել շուրջ 5000 ոստիկանի:
ԵԿԲ շենքի մոտ տեղակայված ակտիվիստների վրանային ճամբարն իշխանությունները քանդել էին դեռ անցնող շաբաթ, սակայն ավելի ուշ ցուցարարները այն վերականգնել էին:
Ոստիկանական բաժիններում որոշ ժամանակ անցկացնելուց հետո ակտիվիստներին ազատել էին:
«Գրավի՛ր Ֆրանկֆուրտը» շարժումը ստեղծվել է ամերիկյան Occupy Wall Street-ի նմանությամբ, որը հանդես է գալիս կապիտալիզմի ներկայիս մոդելի դեմ, ինչը ակտիվիստների կարծիքով՝ «թալանչիական է ու անարդար»:
