«Հրապարակ»-ը գրում է, որ քաղաքական դաշտում հետընտրական թոհուբոհը չհանդարտված, կառավարության կուլիսներում արդեն սկսել է ծավալվել կադրային փոփոխությունների և պաշտոնների վերաբաշխման թեման, և նոր սպասումներ են ի հայտ գալիս:
«Որպես Աժ նախագահի հավանական թեկնածու՝ շարունակում է շոշափվել էդուարդ Շարմազանովի անունը: Միաժամանակ ՀՀԿ- ին մոտ կանգնած աղբյուրները վստահեցնում են, որ Սամվել Նիկոյանը ևս հավակնություն ունի վարչապետ Տիգրան Սարգսյանի աջակցությամբ մնալ իր տեղում: Եվս երկու անուն է շոշափվում Աժ նախագահի կապակցությամբ՝ Աժ նախկին նախագահ Հովիկ Աբրահամյանի և ՀՀ նախագահի աշխատակազմի նախկին ղեկավար Կարեն Կարապետյանի:
Իշխանության հետնաբեմում շարունակում են խոսել Արթուր Բաղդասարյանին գլխավոր դատախազ նշանակելու մասին: Հովիկ Աբրահամյանի անունը, ի դեպ, քննարկվում է ևս երկու պաշտոնի կապակցությամբ՝ Ազգային անվտանգության խորհրդի նախագհի կամ վարչապետի: Վերջինիս աթոռի ևս երկու թեկնածու է նշվում մերձկառավարական շրջանակներում՝ Տարոն Մարգարյանի, ինչն անշուշտ նորություն է, և տարածքային կառավարման նախարար Արմեն Գևորգյանի: Վերջինս կարող է զբաղեցնել գործադիրի ղեկավարի աթոռը միայն մի դեպքում՝ եթե ԲՀԿ-ՀՀԿ կոալիցիան կայանա:
Կադրային նոր սպասումներ են նշմարվում նաև նախարարական մակարդակում: Տեղեկացված աղբյուրները նշում են, որ նախարար դառնալու ցանկություն ունի Վարդան Այվազյանը: Նրա հիմնական առավելությունը, որը կարող է սույն անձին միավոր բերել նախարար դառնալու հարցում, չինական «Ֆորչյուն օյլ» ընկերությունը կես միլիարդ դոլարի ներդրումներով Հայաստան բերելն է: Ընկերությունն այս, ինչպես հայտնի է, երեք հանքավայր ձեռք բերեց Հայաստանում, ինչն ասում են՝ Վարդան Այվազյանի ջանքերի շնորհիվ է եղել: Ասում են՝ նեղ շրջանակներում նա հայտարարել է, թե էլի ներդրումներ կբերի, եթե իրեն բնապահպանության կամ էներգետիկայի նախարար նշանակեն»,- ապա թերթը հավելում է.
«Կրթության և գիտության նախարարի պորտֆելի համար փորձում է պայքարել «հանրապետականացված» Հայկ Բաբուխանյանը: Վերջերս նա սերտ հարաբերությունների մեջ է Արարատյան թեմի առաջնորդական փոխանորդ Նավասարդ արքեպիսկոպոս Կճոյանի հետ: Նրանք հաճախ միասին կերուխումերի են լինում, և բացառված չէ, որ հենց ազդեցիկ արքեպիսկոպոսն է նրա բարեխոսը լինելու կառավարության որոշակի շրջանակներում` հարթելով Հայկ Բաբուխանյանի ճանապարհը դեպի վարչապետ Տիգրան Սարգսյանի թիմ: Ինչպես հայտնի է, նախկինում Հայկ Բաբուխանյանն օգտվում էր Հովիկ Աբրահամյանի բարեհաճ վերաբերմունքից: Սպասվում է, որ առաջիկայում Հովիկ Աբրահամյան-Տիգրան Սարգսյան խուլ հակամարտությունը, որը հատկապես բուռն էր դրսևորվում կառավարության հետ հարցուպատասխանի ժամերին, առաջիկայում ավելի է սրվելու և որոշելու է ներկուլիսային պաշտոնավազքի ընթացքն ու արդյունքները, կապված, թե ում թևն ավելի ամուր կգտնվի:
Իհարկե, վերջին խոսքը նախագահինն է, որը, ինչպես հայտնի է, ձիով քայլերի կողմնակից է, բայց այս պահի դրությամբ արտահոսք է նկատվում Հովիկ Աբրահամյանի թուլացած թիմից դեպի վարչապետականը: Գործընթացն այս տեսանելի է նաև տարածքային կառավարման մակարդակում: Առայժմ ամենաակնհայտ հավակնությունն այս իմաստով ունի ՀՀԿ համամասնական ցուցակի 114-րդ համարը՝ Գագիկ Մելիքյանը, որն այլևս պատգամավոր չէ և պատրաստվում է Տավուշի մարզպետ դառնալ: Նա վաղուց էր բռնել դեպի վարչապետ ճանապարհը, ինչը զգալի էր Աժ վերջին նստաշրջանի ժամանակ, երբ քննարկվում էր Մելիքյանին ՀՀԿ խմբակցության քարտուղար նշանակելու հարցը, և Տիգրան Սարգսյանը, ներկայացնելով Գագիկ Մելիքյանին ՀՀԿ գերագույն մարմնում, նրա մասին ասաց, որ նա «լավիկն է»:
ՀՀԿ վերնախավին մոտ շրջանակներում պատմում են, որ նա վաղուց է աշխատել ներկայիս մարզպետի՝ Արմեն Ղուլարյանի դեմ` տարբեր տեղերում հայտարարելով, որ վերջինս հարստացել է շինարարական «ատկատներ» վերցնելով: Չի բացառվում, որ Գագիկ Մելիքյանի՝ մարզպետ դառնալու ձգտումը պայմանավորված լինի նաև նրան պատկանող գազալցման կայանների վրա հարկայինի «նաեզդներով»»:
