«Վաղը չէ մյուս օրը մեր առևտուրը կազմակերպելու ենք քաղաքապետարանի շենքի մոտ»

Այսօր ոստիկանները փողոցային առևտրով զբաղվող մի շարք քաղաքացիների թույլ չեն տվել մոտենալ քաղաքապետարանի շենքին և իրենց բողոքի ձայնը բարձրացնել. այս մասին «Առաջին լրատվական»-ի հետ զրույցում նշեց փողոցային առևտրով զբաղվող 40-ամյա Հեղինե Պողոսյանը. «Ոստիկանները մեզ թույլ չտվեցին մոտենալ քաղաքապետարանի շենքին, նրանք այսօր շատ ավելի խիստ էին, քան մյուս օրերին, ասում էին, որ մեր մեջ ընդդիմադիր ուժեր կան, և այդ ուժերն են մեզ հրահրում»։
Հեղինեն նաև նշեց, որ իրենք մեկ օր դադար կտան և կսպասեն, որպեսզի իշխանություններն ինչ-որ բան ձեռնարկեն, այդ հարցին լուծում տան, եթե ոչ իրենք կշարունակեն իրենց ակցիաները. «Մենք որոշել ենք քաղաքապետարանի աշխատակիցներին և իշխանություններին հնարավորություն տալ լուծելու այս հարցը, եթե իրենք շարունակեն ոչինչ չձեռնարկել, ապա մենք վաղը չէ մյուս օրը մեր առևտուրը կկազմակերպենք հենց քաղաքապետարանի առաջ, ճիշտ է, քիչ ապրանք կբերենք, որովհետև համոզված ենք, որ ոստիկանները կվնասեն, բայց կկազմակերպենք առևտուրը։ Եթե էլի բան չփոխվի, մենք կգնանք նախագահի նստավայր»։
Հիշեցնենք, որ քաղաքապետ Կարեն Կարապետյանի որոշմամբ, դադարեցվել է Երևանի բոլոր փողոցների առևտուրը։