Այսօր Երևանի «Կոնգրես» հյուրանոցում «Գործընկերություն հանուն բաց հասարակության» նախաձեռնությունը 2012թ. խորհրդարանական ընտրություններին ընդառաջ՝ ներկայացրեց քաղաքացիական հասարակության կողմից մոնիթորինգային ընտրական ծրագրերը: Ինչպես տեղեկացրեց Բաց հասարակություն հիմնադրամներ-Հայաստանի գործադիր տնօրեն Լարիսա Մինասյանը, այսօրվա միջոցառմանը կներկայացվեն մի շարք ծրագրեր, որոնք ֆինանսավորված են կամ համաֆինանսավորված են Բաց հասարակություն հիմնադրամներ-Հայաստանի, ԱՄՆ միջազգային զարգացման գործակալության, բրիտանական և Նիդերլանդների դեսպանատների կողմից:
Ըստ նրա` դրանք շատ տարբեր ծրագրեր են, որոնք նվիրված են ընտրություններին և ընտրական գործընթացներին աջակցելուն, ինչը, Լարիսա Մինասյանի կարծիքով, ընտրությունների նկատմամբ վստահությունն ավելի կբարձրացնի:
Անդրադառնալով ներկայացվելիք ծրագրերին` նա ասաց, որ դրանք ռեսուրսների ստեղծում են, տարբեր կուսակցությունների և խմբակցությունների նախընտրական պլատֆորմների և անցած նստաշրջանի գործունեության վերլուծություն, դրանք կարող են լինել զուտ իրազեկման ծրագրեր, ինչպիսին է Երևանից դուրս հեռուստատեսությունների և նաև օն-լայն լրատվամիջոցների ֆինանսավորումը, որպեսզի նրանք կարողանան ավելի լայն լուսաբանել ընտրությունները: Դրանք կարող են լինել նաև վերահսկողական ծրագրեր, ինչպիսին է «Թրանսփարենսի ինթերնեյշնլ» հակակոռուպցիոն ընկերության վերահսկողական ծրագիրը:
«Կան այնպիսի ոչ օրտոդոքսալ ծրագրեր, ինչպիսիք են արվեստի և մշակույթի միջոցով կատարվող ծրագրերը, որոնք կբարձրացնեն իրազեկությունն ընտրությունների վերաբերյալ: Իրազեկումը շատ պարզ ձևով ենք իրականացնում. դրանք լինելու են հեռուստադեբատներ, հաղորդումներ՝ տարբեր հեռուստաընկերությունների եթերով, օն-լայն մեդիայով ներկայացված տեղեկատվություն: Այս ամենը լինելու է հերթական զեկույցներով»,- մանրամասն ներկայացրեց Լարիսա Մինասյանը:
Ներկայացվելիք ծրագրերից մեկն արդեն մի քանի օր գործարկված iDitord.org ծրագիրն է, որտեղ բոլոր քաղաքացիները ընտրություններին ընդառաջ կարող են ներկայացնել իրենց ահազանգերը ընտրացուցակների, կաշառքների, բարեգործության վերաբերյալ:
Ծրագրի ղեկավար Սամվել Մարտիրոսյանն ասաց, որ կայքում ստեղծված են բոլոր պայմանները, որպեսզի յուրաքանչյուր քաղաքացի կարողանա իրեն անհանգստացնող փաստերը տեղեկացնել:
Ըստ նրա` տվյալների այդ բազայից կարող են օգտվել նաև լրագրողները և գնալ այդ խախտումների հետքերով, որովհետև ներկայացվելու են նաև շատ կոնկրետ դեպքեր:
Սամվել Մարտիրոսյանն ասաց, որ յուրաքանչյուր ահազանգ փոքր-ինչ ուշացմամբ է տեղադրվում կայքում, քանի որ որոշակի խմբագրում է անցկացվում:
«Այս ծրագիրը ընտրությունների տրամաբանության մեջ կշարունակվի նաև հետընտրական մի որոշ շրջանում, իսկ հետագայում կարող է կիրառվել նաև նախագահական և ՏԻՄ ընտրությունների ժամանակ»,- նկատեց iDitord ծրագրի ղեկավարը:
Նշենք, որ ընտրությունները վերահսկող ծրագրերի հանրային ներկայացմանն իր բացման խոսքով հանդես եկավ Լարիսա Մինասյանը, ելույթներով հանդես կգան տարբեր ծրագրերի ղեկավարներ ևս:
