ԱԺ ՀՅԴ պատգամավոր Լիլիթ Գալստյանը կարծում է, որ Տիգրան Կարապետյանի բազմամարդ միտինգների «ֆենոմենը» կայանում է նրանում, որ ժողովրդի համբերությունը սպառվել է, և նա պաշտպանվածություն փնտրում. «Այսօր շատերը, հատկապես քաղաքական դաշտում, տարակուսում են, փորձում հասկանալ Տիգրան Կարապետյանի բազմամարդ միտինգների ֆենոմենը։ Ոմանք էլ չեն դիմանում ու պիտակավորելով փորձում են «մխիթարել» իրենց։ Իսկ պատճառը, իմ կարծիքով, հստակ է։ Սպառվել է իրավական կամայականությունները հանդուրժելու` ժողովրդի համբերությունը։ Չպաշտպանված, ամեն վայրկյան սոցիալական անարդարության զոհ դարձող, ոտնահարված իրավունքներով ու սոցիալական համերաշխությունը կորցրած մեր հասարակությունը պաշտպանվածություն է փնտրում։ Սոցիալական պետության կոնցեպցիան ձախողած պետության մեջ շատ էլ բացատրելի է, որ նվաստացած հասարակությունը իր իրավունքների ու խնդիրների պաշտպանությունը փորձում է հրապարակում գտնել։ Իսկ առիթ մեր իշխանությունները տալիս են ամեն քայլափոխի՝ հակասոցիալական ու հակաժողովրդավարական բազմաթիվ օրենքներից ու նախագծերից սկսած մինչև խորացող տնտեսական ու բարոյական ճգնաժամ։ Չի կարելի թերագնահատել ու չարաշահել Ժողովրդի համբերությունը»։