Այսօր լրագրողների հետ հանդիպման ժամանակ թիվ 2 ընտրատարածքում մեծամասնական ընտրակարգով առաջադրված ՀԱԿ պատգամավորության թեկնածու Վլադիմիր Կարապետյանը տարօրինակ համարեց լրագրողի այն տեղեկությունը, թե ասվում է՝ հավասար պայմաններ են ստեղծվել թիվ 2 ընտրատարածքում:
Նա նշեց՝ իր մրցակիցը հայտարարել է, որ ունի 37 ընտրական շտաբ: «Ուզում եմ տեղեկացնել, որ երկու օր առաջ ՀԱԿ կարգախոսի վերաբերյալ «Հայլուր»-ի նկարահանող խումբը հարցազրույց վերցրեց ինձնից, և ինձ տեղեկացրին, թե այն հեռարձակվելու է կիրակնօրյա ծրագրով, սակայն պարզվեց, որ իմ ռեպորտաժը չկա, հինը կրկնեցին։ Այնուհետև պարզվեց, որ խոտան է եղել, իսկ բոլորս գիտենք, թե ով է «Հայլուր»-ի ղեկավարը, այնպես որ՝ հավասարության մասին խոսելն ավելորդ է»,- նկատեց պատգամավորի թեկնածուն` հավելելով, որ դա իրեն չի վհատեցնում:
Վլադիմիր Կարապետյանի խոսքով` փորձելու է հասնել նրան, որ ժողովուրդը հասկանա՝ արմատական փոփոխություններն անխուսափելի են:
Նա նշեց, որ պայքարելու են ժողովրդի վստահության քվեն շահելու համար: «Քաղաքական ուժերի հետ համագործակցում ենք շատ կարևոր մի հարցում՝ ընտրակեղծիքների դեմ պայքարի հարցում, և դա համարում եմ առաջնահերթություն»,- նշեց Վ. Կարապետյանը` ընդգծելով, որ դա ՀԱԿ առաջնահերթությունն է:
Նա նաև դրական գնահատեց այն, որ ԲՀԿ-ն ստորագրել է միասնական շտաբ հիմնելու վերաբերյալ փաստաթուղթը, որը հիմքեր է տալիս ենթադրելու, որ համագործակցության շատ լավ դաշտ կստեղծվի ընտրակեղծիքների դեմ պայքարում:
Անդրադառնալով իր նախընտրական արշավին` Վ. Կարապետյանն ասաց, որ աշխատանքներ են իրականացնում իր ընտրատարածքում: Ըստ նրա՝ ինքն ունի չորս ընտրական շտաբ, որոնց ղեկավարները զբաղվում են ընտրացուցակներով:
«Մենք հայտնաբերել ենք մեկ բնակարան, որում գրանցված էին երեք հոգի, իսկ այսօր տասներկու մարդ կա՝ տարբեր ազգանուններով: Մենք պետք է պարզենք, թե ով է պատասխանատվություն կրելու դրա համար: Այսօր ենք դիմելու, և ես հրապարակելու եմ այդ փաստը։
Բնականաբար, մեր հնարավորությունները չեն բավարարում՝ պարզելու համար, թե ընտրացուցակում ներգրավված անձինք ապրո՞ւմ են այդ բնակարաններում, թե՞ բացակայում են երկրից: Դա է պատճառը, որ երեք քաղաքական ուժերը դիմել են վարչապետին՝ բացակա անձանց ցուցակը տրամադրելու պահանջով»,- տեղեկացրեց Վ. Կարապետյանը` հույս հայտնելով, արձագանքը արագ կլինի, և դա կօգնի ապահովել ազատ և արդար ընտրություններ:
