Britain’s Got Talent-2012 շոուի 17-ամյա մասնակից, բրիտանացի Ջոնաթան Անտուանը ցնցել է հանդիսատեսին և ժյուրիի անդամներին `կրկնելով շոտլանդացի երգչուհի Սյուզան Բոյլի ճակատագիրը, ով աստղ դարձավ Britain’s Got Talent-2009 շոուին մասնակցելով։
Բրիտանական լրատվամիջոցները երիտասարդին կոչել են SuBoy` այսինքն` Սյուզանի երեխա: YouTube-ում նրա ելույթի տեսագրության դիտումների թիվը 5 օրում գերազանցել է 4 միլիոնը: Ջոնաթանին կոչել են նաև Մեծ Ջոն:
Նա բեմ է բարձրացել իր ընկերուհու` Շարլոտ Ջակոնելիի հետ: Նրանք միասին երգել են «Աղոթք» երգը, որը Սելին Դիոնը կատարել է Անդրեա Բոչելիի հետ: Հանդիսատեսը նրանց հիանալի կատարմանն արձագանքել է բուռն և երկարատև ծափահարություններով: Ժյուրին հայատարարել է, որ Ջոնաթանը փայլուն ձայնային տվյալներ ունի:
Չնայած ցնցող կատարմանը, Անտուանին մրցույթի հաջորդ փուլ թողնելու որոշումը ժյուրին միանգամից չի կայացրել: Ժյուրիի անդամները պահանջել են, որ Ջոնաթանը հանդես գա միայնակ` առանց ընկերուհու, ինչին ի պատասխան Ջոնաթանը պատասխանել է, որ մրցույթի ողջ ընթացքում իրենք հանդես են գալու միասին` դուետով:
Ինչպես տեղեկացնում է The Sun-ը, տաղանդավոր երիտասարդը կշռում է 130 կիլոգրամ: Նրա ծանր քաշը նյարդային պոռթկման պատճառ է դարձել: 2011 թ. հոկտեմբերին նա ստիպված է եղել որոշ ժամանակ անցկացնել կլինիկայում:
Ավելորդ քաշը և դրանից բխող ծաղրանքները ստիպել էին Ջոնաթանին դուրս գալ դպրոցից: Նա նյարդային ու անվստահ էր դարձել, սակայն այժմ երգի մրցույթում ունեցած հաջողությունը վերականգնել է տղայի՝ իր ուժերի նկատմամբ ունեցած վստահությունը:
