ԱՄՆ-ը թույլատրել է, այն սիրիացիներին, ում այցագրի ժամկետը լրացել է, ժամանակավոր մնալ ԱՄՆ տարածքում: Այս մասին հայտարարել է ԱՄՆ ազգային անվտանգության նախարար Ջանեթ Նապոլիտանոն:
Ինչպես հաղորդում է ITAR TASS-ը, ԱՄՆ իշխանությունները երկրից չեն վտարի սիրիական ծագմամբ անօրինական ներգաղթյալներին, քանի որ Սիրիայում նրանք կարող են բախվել «անձնական անվտանգության լուրջ սպառնալիքների հետ»:
Նա նշել է, որ այն սիրիացիներին, ում այցագրի ժամկետը լրացել է, կտրվի ամերիկյան կառավարության պաշտպանության տակ գտնվող անձանց կարգավիճակ: Իհարկե, սկզբում նրանք ստիպված կլինեն անցնել երկար գործընթաց՝ կապված անձնական տվյալների ստուգման հետ:
Վերջին շաբաթներին ԱՄՆ պաշտոնական ներկայացուցիչները, այդ թվում՝ նախագահ Օբաման, բազմիցս հայտարարել են, որ Սիրիայում անհրաժեշտ է նախևառաջ հասնել բռնության դադարեցմանը և ապահովել մարդկանց անվտանգությունը: Նրանք նաև ասել են, որ չեն պատրաստվում հասնել նախագահ Բաշար Ալ-Ասադի տապալմանը, և հրաժարվում են զենք տրամադրել ընդդիմությանը:
