Իրանը խնդրել է Եմենի հութների շարժմանը պատրաստ լինել փակելու Կարմիր ծովի նավթային երթուղին, եթե Միացյալ Նահանգները հարված հասցնի իրանական էներգետիկ ենթակառուցվածքներին: Այս մասին Reuters-ին հայտնել է իրավիճակին ծանոթ երեք աղբյուր։
Ըստ հրապարակման՝ այս մարտավարությունը նոր լուրջ սպառնալիք է ներկայացնում համաշխարհային էներգամատակարարման համար։
Իրանցի երկու բարձրաստիճան աղբյուր և թեմային ծանոթ տարածաշրջանային մեկ այլ աղբյուր, խոսելով անունը չբացահայտելու պայմանով, հայտնել են, որ գաղափարը քննարկվել է Իսլամական Հանրապետության ղեկավարության շրջանում, և ուղերձը փոխանցվել է Իրանի դաշնակից հութիներին:
Աղբյուրները նշել են, որ հութները վերջերս տեղեկացվել են Թեհրանի խնդրանքի մասին։ Նրանք չեն մանրամասնել, թե ինչպես է ուղերձը փոխանցվել կամ արդյոք դա եղել է ԱՄՆ նախագահ Դոնալդ Թրամփի կողմից հուլիսի 14-ին Իրանի էներգետիկ ենթակառուցվածքներին հարվածելու սպառնալիքից հետո։
Հութիներին մոտ կանգնած աղբյուրը հայտնել է, որ շարժումն ավարտել է նավերի վրա հարձակվելու նախապատրաստական աշխատանքները՝ հրթիռներ և անօդաչու թռչող սարքեր տեղակայելով Բաբ էլ-Մանդեբի նեղուցի մոտ, որը Կարմիր ծովի դարպասն է, և սպասում է մեկնարկի հրամանին։
Իրանի արտաքին գործերի նախարարությունը և հութիների խոսնակը չեն արձագանքել Reuters-ի հարցմանը՝ մեկնաբանելու այս տեղեկությունները:
Միևնույն ժամանակ գործակալությունը հաղորդում է, որ այս լուրերի ֆոնին նավթի գինը կրկին բարձրացել է: Brent նավթի ֆյուչերսները բարձրացել են 88 ցենտով կամ 1,04%-ով՝ հասնելով մեկ բարելի դիմաց 85,83 դոլարի, իսկ ԱՄՆ WTI տեսակի նավթի ֆյուչերսները բարձրացել են 94 ցենտով կամ 1,18%-ով՝ հասնելով մեկ բարելի դիմաց 80,54 դոլարի:
