ԱՄՆ կառավարությունը հինգշաբթի օրը հաղորդել է, որ Իրանն ԱՄՆ-ից կրկին 60000 տոննա ցորեն է գնել` երկու շաբաթվա ընթացքում իր գնած ցորենը հասցնելով 180.000 տոննայի: Արդյունաբերական աղբյուրներն ասում են, որ այս գնումների շնորհիվ հացահատիկի առևտուրը երկու երկրների միջև վերսկսվել է` չնայած ԱՄՆ-ի կողմից Իրանին միջուկային ծրագրի պատճառով ներկայացված պատժամիջոցները:
Reuters-ը հաղորդում է, որ ԱՄՆ-ից Իրանի կողմից ցորենի այս գնումներն առաջինն են երեք տարվա մեջ և դրանք շարունակվելու են, և կատարվելու է ևս 220.000 տոննա գնում:
Արտահանման աղբյուրներն ասում են, որ 400.000 տոննա ցորենի գինն, ամենայն հավանականությամբ, 160 միլիոն դոլար կլինի:
Հաղորդվում է, որ ցորենն, ըստ երևույթին, Իրանին վաճառվել է համաշխարհային շուկայական գներից մեկ տոննայի համար 25-30 դոլար թանկ գնով:
Առևտրային աղբյուրները հայտնել են, որ Իրանի մատակարարներն, ամենայն հավանականությամբ, Cargill և Bunge ընկերություններն են, բայց վերջիններս հրաժարվել են մեկնաբանություններ անել:
