Այսօր լրագրողների հետ հանդիպմանը երգչուհի Շուշան Պետրոսյանը և մյուս կին բանախոսները անդրադարձան հետևյալ թեմային՝ ինչ է երջանկությունը կնոջ համար:
Շուշան Պետրոսյանի կարծիքով` մեծագույն երջանկություն է, երբ ապրում ես քո քաղաքում, քո տանը և հասցնում ես լինել և՛ մամա, և՛ կին, և՛ աշխատանքդ ես հասցնում, և՛ քո ներքին նվիրական զգացումներն ես փորձում իրագործել: Նա ասաց, որ ունի մի երազանք, և դա ոչ հօգուտ իր ընտանիքի է:
«Ես մոտ մեկ ամիս տնից բացակայում եմ, երբ գնում եմ սահման` զինծառայողների մոտ: Դա իմ խենթությունն է, և ես առանց դրա պարզապես չեմ կարող: Ես ուրախ եմ, որ այդ ամենը կարողանում եմ զետեղել մի Շուշանի մեջ: Այն Շուշանի, ով ապրում է Երևանում, ով սիրում է իր երեխաների հետ քայլել Աբովյան փողոցով:
Շատ ուրախ եմ Մաշտոցի պուրակի երեխաների համար: Ես մոտ մեկ շաբաթ առաջ այցելեցի նրանց և ասացի, որ հանկարծ ետ չկանգնեն իրենց մտքից, որովհետև ամեն ինչ սկսվում է երկու-երեք ծառից: Ես ուզում եմ, որ իմ երեխաներն առողջ լինեն:
Ուզում եմ ամեն անգամ պատշգամբս բացելիս չտեսնեմ Նորքի դատարկ տարածությունը, որը նախկինում անտառ էր և ապահովում էր այս քաղաքի օզոնը: Ես ուզում եմ այդ ամենը վերականգնվի: Ուզում եմ, որ այն բուտիկները, որոնք, այնուամենայնիվ, կարծես թե կառուցվել են, վերանան: Ուրախ էի, որ Մաշտոցի պուրակի շարժումը կար, որովհետև նմանատիպ շարժում սկսվեց 88 թվականին, երբ մենք այդ երեխաների տարիքին էինք»,- նշեց Շուշան Պետրոսյանը` Մաշտոցի պուրակի շարժումը համարելով ինչ-որ առումով ուռճացված, բայց շատ կարևոր քայլ:
Համատեղ ասուլիսի ընթացքում կանացի երջանկության համար սիրելու ունակությունը կարևորեց երգահան, երգչուհի Լիլիթ Պիպոյանը: Ըստ նրա` կնոջ երջանկության համար անհրաժեշտ են պարզ բաներ`սիրել և սիրված լինել:
«Սրա մեջ շատ մեծ իմաստներ կան, հատկապես սիրելու մեջ: Սովորաբար կարևորը սիրված լինելն են համարում, բայց ես ուզում եմ պնդել, որ կարևորը սիրելն է` ոչ միայն մարդուն, այլև ուրիշ բաներ: Եթե հոգիդ լցված է սիրով, ուրեմն դու երջանիկ ես»,- մեկնաբանեց սիրված երգահանը:
«Հրապարակ» օրաթերթի գլխավոր խմբագիր Արմինե Օհանյանի կարծիքով` երջանկությունը լիարժեք իրացված լինելու մեջ է: Նրա համոզմամբ` կինը պետք է կարողանա ընտրել այն կյանքը, այն ապրելակերպը, որը ցանկանում է:
«Կինը պետք է իր ընտրության մեջ ազատ լինի, պարտադրված չլինի ինչ-որ բաներով: Նա պետք է լիարժեք իրացված լինի` աշխատանքում, իր ընտանիքում»,- ամփոփեց Արմինե Օհանյանը:
