Երեկ Իսրայելի նախագահ Շիմոն Պերեսն ասել է, որ Իսրայելը չի ձգտում պատերազմ սկսել Իրանի դեմ, սակայն պատերազմի դեպքում իր երկիրը հաղթանակ կտոնի: «Իսրայելը տեսել է պատերազմի սարսափները: Նա չի ձգտում դրան: Մենք միշտ նախապատվությունը տալիս ենք խաղաղությանը, սակայն եթե մենք ստիպված լինենք կռվելու, մի կասկածեք, որ մենք կհաղթենք»,- ասել է Պերեսը` ելույթ ունենալով Վաշինգտոնում Ամերիկա-իսրայելական հասարակական հարաբերությունների հանձնաժողովի նիստի ժամանակ: Այս մասին հաղորդում է ITAR-TASS գործակալությունը:
Նա ասել է, որ ԱՄՆ-ը և Իսրայելն ունեն մեկ միասնական նպատակ` թույլ չտալ, որպեսզի Իրանը ստանա միջուկային զենք: Պերեսը հավելել է, որ «Իրանը նպատակ ունի վերահսկելու Մերձավոր Արևելքը, դրանով նա կվերահսկի աշխարհի տնտեսության զգալի մասը. նրան պետք է կանգնեցնել, և նրանք կկանգնեն»:
Նույն կոնֆերանսին ելույթ է ունեցել նաև ԱՄՆ նախագահ Բարաք Օբաման, որը նույնպես ելույթի մեծ մասը նվիրել է Իրանի խնդրին: «Մենք բոլորս կնախընտրեինք այդ հարցը լուծել խաղաղ ճանապարհով: Սակայն Իրանի առաջնորդները չպետք է կասկածեն Միացյալ Նահանգների վճռականությանը, այնպես, ինչպես չպետք է կասկածի տակ դնեն Իսրայելի իրավունքը՝ սեփական անվտանգության ապահովման համար ինքնուրույն որոշումներ կայացնելու վերաբերյալ»,- ասել է Օբաման:
Նա կրկին վերահաստատել է նախկինում արտահայտած իր այն միտքը, որ ԱՄՆ-ը կօգտագործի իր ողջ հզորությունը, եթե դա անհրաժեշտ լինի երկիրը և երկրի շահերը պաշտպանելու համար:
