ԱՄՆ Կոնգրեսի 112-րդ նստաշրջանում նախատեսված է քննարկել Լեռնային Ղարաբաղի հիմնահարցը: ԱՄՆ Կոնգրեսի 112-րդ նստաշրջանի ժամանակ քննարկման հանված հիմնական թեմաների մեջ կլինեն հետևյալ խնդիրները` Ղարաբաղյան հիմնահարցը, Ադրբեջանի էներգետիկ ոլորտի զարգացման հարցը, Հայաստանի տնտեսական զարգացման հարցը և Վրաստանի վերականգնումը 2008 թ. Ռուսաստանի հետ պատերազմից հետո: Այս մասին հայտարարել է Եվրասիայի հարցերով փորձագետ Ջիմ Նիկոլը` ԱՄՆ Կոնգրեսում ներկայացված «Հայաստան, Ադրբեջան, Վրաստան. քաղաքական գործընթացները և դրանց ազդեցությունը ԱՄՆ շահերի վրա» զեկույցում: Հայ ազգային կոնգրեսի արտաքին հարցերի պատասխանատու Վլադիրմիր Կարապետյանը «Առաջին լրատվական»-ի հետ զրույցում հիշեցրեց, որ ԱՄՆ Կոնգրեսում էլի են եղել նման քննարկումներ, և սա առաջին դեպքը չէ: ՀԱԿ ներկայացուցիչը տեսակետ հայտնեց, որ ԱՄՆ-ն սկսել է շատ ուշադրություն դարձնել տարածաշրջանին: «Կարծում եմ, որ այդ քննարկումները ևս մեկ վկայությունն են այդ ուշադրության: Կարևոր է, որ այդ քննարկումներին հրավիրվեն համապատասխան փորձագետներ, քաղաքական ուժերի ներկայացուցիչներ, ինչն էլ լրացուցիչ տեղեկատվական նշանակություն կունենա կոնգրեսականների համար»,- ասաց Վլադիմիր Կարապետյանը: «Առաջին լրատվականը» հետաքրքրվեց, թե արդյոք Հայաստանը պատրա՞ստ է ադեկվատ կերպով ներկայանալ այդ քննարկումներին, եթե նկատի ունենանք, որ քննարկվելու է նաև Լեռնային Ղարաբաղի հարցը: ՀԱԿ ներկայացուցիչը հիշեցրեց, որ ընդդիմությունն ՀՀ իշխանությունների մասին իր կարծիքը բազմիցս է արտահայտել: Նա միայն նշեց, որ եթե հրավիրվեն քաղաքական տարբեր ուժերի ներկայացուցիչներ` մասնակցելու այդ քննարկումներին, ապա այնտեղ նրանք իրենց տեսակետները կհնչեցնեն: Իսկ այդ հարցում, ըստ Վլադիմիր Կարապետյանի, պետք է շահագրգռված լինեն առաջին հերթին ԱՄՆ Կոնգրեսի ներկայացուցիչները և ձգտեն քննարկումներին ներգրավել տվյալ երկրների քաղաքական ողջ սպեկտրը:
